MANILA (Mindanao Examiner / Jan. 26, 2012) – Patay na umano si Negros Occidental Rep. Ignacio “Iggy” Arroyo matapos na atakihin sa puso sa London na kung saan ito napabalitang nagpapagamot dahil sa kanyang sakit sa atay.
Sa ulat ngayon araw ng RMN ay kinumpirma diumano ni dating First Gentleman Jose Miguel “Mike” Arroyo ang pagpanaw ng kapwa kontrobersyal na nakababatang kapatid.
“Patay na si Congressman Iggy Arroyo dahil sa cardiac arrest. Sa report ni Rey Nadar, tumawag sa kanya si dating First Gentleman Mike Arroyo at kinumpirma niya ang pagpanaw ng kanyang kapatid habang nagpapagamot ito sa London.”
“Wala pang malinaw na detalye hinggil sa burol ng bayaw ni dating pangulong Gloria Arroyo pero tiniyak ni Atty. Mike na i-uuwi sa bansa ang bangkay nito. Matatandaang nagtungo sa London si Congressman Iggy upang magpagamot sa kanyang liver ailment,” ani pa ng RMN.
Matatandaang Inako ni Ignacio ang bang account na nakapangalan sa isang Jose Pidal sa kasagsagan ng imbestigasyon ng Senado noon ukol sa tagong-yaman ng mag-asawang Jose at dating Pangulong Gloria Arroyo.
Ilan linggo ng nagsasagawa ng imbestigasyon ang Senado ng biglang akuin ni Ignacio na siya umano si Jose Pidal at kanya ang daan-daang milyong pisong nakaimbak sa bangko.
Si Senador Panfilo Lacson ang naglabas ng impormasyon ukol sa “Jose Pidal Account” na diumano’y ginamit na pangalan ni Jose Arroyo upang itago ang salapi.
Naging maiinit na talakayin sa social networking site na Facebook ang pagpanaw ni Ignacio, subali’t halos walang simpatiya ang maraming mga sumusubaybay sa balita dahil sa naging papel ng mambatatas sa mga diumano’y anomalya ng mag-asawang Arroyo.
Itinanggi noon ng mag-asawang Arroyo ang lahat ng bintang laban sa kanila. (Mindanao Examiner)
20