Mga Sulat gikan sa Davao :
NING-ABOT NA na mi diri sa makasaysayanong syudad sa Vienna. Pagtungtong gyud namo sa teritoryo sa Austria gikan sa Hungary nga nagmora og dakong wanang sa bag-ong gikultibar nga kaumahan nga makadani sa atensyon. Human na ang winter apan wa pa magmata ang kabungturan ug kaumahan. Wa pay ningbukhad nga kabulakan sa spring apan hapit na kay wala na may snow. Di na madugay ang kakahuyan manahon og berde. Daplin sa dakong sapa sa Danube ang Hilton Danube Hotel. Og wa ko kasuroy karon sa Uropa, dili ko masayud nga kining sapaa ningsubay diay sa pipila ka nasud sa Uropa. Niadtong niaging duha ka gabii sa Budapest, ninglabigar mi sa sapa sa Danube ug sa restawran sa barko na mi nangaon. Karon, kada abli nako sa bintana sa among kwarto sa Hilton, sugaton ko og kahingangha ug pagdayeg sa asul nga sapa sa Danube.
Ang mantalaan nga USA TODAY dunay usa ka espesyal nga edisyon dinhi. Duha ka butang ang ningdani dayon sa akong pagtagad. Si US President Trump ningkopya sa giyera kontra sa droga sa Pilipinas, Singapore ug China. Nakiggubat si Trump kontra sa manngilngig nga hulga sa droga sa America nga nagapatay og di momenos 30,000 ka biktima kada tuig ug nagapaantos sa mga bag-ong natawo nga mga bata og mga upat ka tuig gikan sa pag-anak. Segurado ni kun ang ilang mga ginikanan adik sa mga synthetic nga opioid o kemikal nga droga nga ginapayuhot pinaagi sa lungag-lungagon nga utlanan sa Estados Unidos ug Mexico.
Nanawagan sab si Trump sa silot nga kamatayon sa mga tigpayuhot og droga. Matud pa niya, ang tigtulak og droga nagabiktima og daghan og nagabuno (murder) og gatusan ka tawo bisan og wa siya mogamit og pusil. Naalarma si Trump ug kun tugotan lang siya, idasdas niya ang giyera kontra sa mga sindikato sa droga nga way kukaluoy. Ang ikaduha mao ang pagbabag sa nangulo sa sanga sa human rights sa UN, si Zeid Ra’ad al-Hussein, aron dili siya makahatag og pakigpulong atubangan sa UN Security Council. Basig kuyapan ang mga sabaan ug alingugngog nga mga kritiko ni Presidente Duterte ug ang Commission on Human Rights kun makahibalo niini.
Daghang mga miyembro nga nasud nga suportado sa Russia ug China ningprotesta batok sa pagtuki sa isyu sa human rights sulod sa Security Council. Nakakaon lagi siya og tagam. Wa siyay kalainan sa ICC prosecutor nga nagahukom base sa hulohungihong lamang sa mga tabian og baba. Ang Vienna ang sentro sa classical music ug mga bilding nga pwerteng nindota. Sama sa syudad sa Budapest sa nasud sa Hungary, ang Vienna ningpahiuli sa mga bilding nga nadaut sa mga giyera. Ang mga palasyo ug ang parliament gipreserba ug magpanon ang libo ka libong turista ug mga estudyante sa mga nagkalainlaing universidad sa Uropa aron pagbisita ug pagsud-ong sa katahum sa nagatagbo nga karaan ug moderno nga kasaysayan.
May pito ka Filipino-American nga apil niining among Imperial Europe Tour. Naghimaya sila sa mga dagko kaayo nga mga proyekto nga seryoso gyud nga ipursige sa administrasyong Duterte. Gipasaligan nako sila nga kining mga proyektoha buhi nga realidad sa di pa mahuman ang termino sa administrasyong Duterte. (Jun Ledesma)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/
http://mindanaoexaminernewspaper.blogspot.com/
Share Our News
Digital Archives: http://issuu.com/mindanaoexaminernewspaper
20
