Katawhan, gidasig pabakunahan binuhing iro

CAGAYAN DE ORO CITY – Gidasig ang katawhan sa kabarangayan pagpabakuna sa ilang mga iro batok rabies. Kini nunot sa pagsaulog sa Rabies Awareness Month dinhi sa syudad nga adunay temang: “Maki-isa sa Baranggayan Kontra Rabies, Maging Responsableng Pet Owner.”

Atol sa sinemanang pagpakayab sa nasudnong bandila sa City Hall, si City Veterinarian Dr. Perla Asis mipahibalo nga nagsugod ug nagpadayon ang ilang buhatan sa pagpamakuna sa iro dinha sa mga barangay ug gani direkta kini ngadto sa kabalayan.

Niini, si bise mayor Kikang Uy miaghat sa mga kawani sa City Hall nga pabakunahan ang ilang mga binuhing iro ug mahimong responsableng pet owner ilabina nga adunay balaod alang sa maong katuyuan  nga  nagpahamtang og multa  alang niadtong  dili motamod.

Nasayan nga ang City Veterinarian Office ug Department of Education mipasiugda og poster-making contest pahaum sa kasaulogan nga giapilan sa mga tinun-an sa elementarya sa nagkalain laing tunghaan.

Nanawagan usab ang bise mayor sa katawhan pagpabakuna sa ilang mga binuhing iro aron pagsiguro nga luwas kini sa rabies ug usab mahimong responsable sa pagpamuhi sa ilang mga iro aron dili usab kini makaperwesyo sa uban. Ang pagpamakuna sa mga iro gitakda karong semana dinha sa barangay Tablon. (Yonggals)