PAGADIAN CITY – Hawak ng pulisya ngayon ang isang truck driver at kanyang helper matapos silang mahulihan ng mga kemikal habang ibinabiyahe sa bayan ng Labangan sa Zamboanga del Sur province.
Sinabi ng pulisya na iniimbestigahan pa ang driver ng truck na nakilalang si Joeliver delos Santos dahil sa karga nitong kemikal na naharang ng mga miyembro ng Zamboanga Del Sur Provincial Public Safety Company kamakailan lamang.
Nabatid na galing ng Zamboanga City ang truck at patungo sana sa Davao City ng ito’y ma-intecept ng pulisya. Hindi maipaliwanag ng driver kung anong uri ng kemikal na kanyang dala at wala rin itong maipakitang papeles o dokumento sa cargo.
Nanatiling tikom ang bibig ng driver at agad naman ipinadala ng pulisya ang kemikal upang mabatid kung anong uri ito o sangkap ba sa paggawa ng mga pampasabog.
Mataas ang seguridad ngayon sa Zamboanga at Davao dahil sa banta ng terorismo at mga sympathizers ng grupong ISIS sa Mindanao. (Mindanao Examiner)
20