DIPOLOG CITY (Mindanao Examiner / Apr. 1, 2014) – Patay ang isang 42-anyos na lalaki matapos itong tadtarin ng bala ng dalawa sa apat na armadong hired killers sa bayan ng Katipunan sa Zamboanga del Norte province.
Kinilala naman ni Insp. Dahlan Samuddin, ang regional police spokesperson, ang biktima na si Renato Santarita at nabatid na nakaupo lamang si Santarita sa harapan ng isang tindahan gabi ng Lunes ng may dalawang motorsiklo na may lulan ng apat na katao ang pumarada sa di-kalayuan.
Isa sa apat na armado ang biglang bumaril sa biktima at kahit sugatan ay nakuha pa nitong makatakbo palayo sa mga salarin, subali’t sumubsob naman ito sa lupa dahil sa tinamong sugat. Nilapitan pa ito ng kanyang salarin at saka muling binaril at hindi pa nakuntento ang kasamahan nito at bumaba pa ng motorsiklo at binaunan pa ito ng bala.
Isinugod pa ng kanyang mga kaanak at pamilya si Santarita matapos na tumakas ang mga salarin, ngunit dead on arrival na ito dahil sa maraming tama ng bala mula sa .45-caliber pistol. Nabawi ng mga imbestigador ng pulisya ang 8 basyo ng bala sa lugar at patuloy ang pagsisiyasat ng mga awtoridad sa motibo ng pagpaslang at kung sino ang nasa likod nito, ani Samuddin.
Walang ibinigay na pahayag ang pamilya ng biktima ukol sa pagpatay kay Santarita. (Mindanao Examiner)
20