Letters to the Editor: CARAGA Cluster Kabahin Sa Mga Panghitabong Kagubot Sa Region

ANG KONSEHO sa Mindanao Peoples’ Peace Movement – CARAGA Region ug ang mga giimbitahang partisipante atol sa Cluster Council Meeting nga gipahigayon petsa 24 sa Hulyo tuig 2014 sa Purok 13, Poblacion, Sibagat, Agusan del Sur buot ipaabot kini nga pamahayag sa publiko ug mga hingtungdang partido sa kagubot:

Kusganon kami nga nagKONDENA sa tanang klase sa pagpangyatak sa tawhanong katungod;

Pagsupak ug pagpaundang sa silot-kamatayon ug paghatag ug igong bili sa kinabuhi sa tawo bisan pa ug kini sad-an, ingon man usab nga undangon ang tanang klase sa pagpangharass, pagpanghulga, ug pagpanghadlok sa mga lider-Tribu ug lider-komunidad;

Kami kusganong nanawagan sa pagpahiuli sa kalinaw sa mga komunidad, pag-undang na sa mga engkwentrong armado sulod sa mga teritoryo sa mga Lumad, ang pag-undang sa pag-unay pinatyanay sa isig ka Lumad, ug pag-undang sa pag-gamit sa mga Tribu nga instrumento sa mga armadong kalihukan;

Kusganon namong gipanawagan sa Goberno sa Pilipinas ug National Democratic Front ug CPP-NPA nga hugot nilang tamdan ang Komprehensibong Kasabutan kalabot sa Pagtahod sa Tawhanong Katungod ug International nga Makitawhanong Katungod (CARHRIHL) nga hatagan ug igong suporta ug hinabang ang mga biktima ug bayaran ang mga kadaot nga nahatag sa maong kagubot ug ang paghatag ug igong gibug-aton sa pagkaluwas sa mga sibilyan sa tanang higayon;

Respetuhon ug ilhon ang tawhanong katungod sa mga Lumad/tribu sa ilang sistema sa pagdumala ug hustisya sa sulod sa ilang mga teritoryo;

Amo usab ipaabot ang among suporta sa mga kaigsoonang Lumad sa sulod sa Autonomous Region for Muslim Mindanao sa ilang pakigbisog alang sa ilang katungod sulod sa Kasabutang Pangkalinaw tali sa Goberno sa Pilipinas ug Moro Islamic Liberation Front ngadto na sa mugnaong Bangsamoro nga goberno. Subay usab sa among pagsuporta sa katumanan sa Katungod sa Pagkinaugalingon sa mga igsoong Bangsamoro;

Sa katapusan, among pag-awhag usab sa tanang katawhan sa CARAGA Region ug Mindanao nga mas maghugpong ug ipadayon ang mga paningkamot sa katumanan sa kalinaw ug kalambuan nga dugay nang gipangandoy sa tanan.

Ang among pagtamod sa prinsipyo sa Kalinaw nga Malangkubon,

Rev Pedro P. Fenis, Jr – Katawhang Migrante
Felix C. Bada “Datu Manlikadan”   – Manobo
Carlito C. Rosmeros – Higaonon            
Danilo C. Bada “Datu Matatao” – Manobo-Banwaon
Clemente Gitgitin   – Katawhang Migrante
Valtimore B. Fenis  – Katawhang Fenis
Wilfredo Batis – Manobo          
Albert Bada – Manobo              
Aga Zacaria – Maranao            
Valentina Balbosina – Higaonon     
Jaime Barusa “Datu Mansuporta” – Manobo-Banwaon   
Lady Love Jadulan – Higaonon                               
Hanna Frusein S. Escobido – Katawhang Migrante
Rogelio Pagios, Sr. – Manobo