Pahayag sa Coal Resistance Movement
Bulan sa Hulyo gideklara sa kagamhanan sa Pilipinas isip bulan sa nutrisyon ug bulan alang sa kahimatngon kabahin sa kalamidad. Duha ka managlambigit nga hisgutanan – Kinaiyahan ug Panglawas.
Kusganong nagkampanya ang kagamhanan pinaagi sa mga balaudnon ug pagpahinumdom ug pagpanudlo sa mga maayong kahimuan aron nga mahimong balance ang nutrisyon sa katawhan ug mamahimong magmahimsog uban sa panawagan niini nga kanunayng magkat-on sa mga pagpangandam ug mga angayng dumdumon panahon ug saw ala pa ang mga kalamidad nga may kalambigitan ang kinaiyahan.
Namahimong nagkagrabe ang nasinati sa kalibutan nga kainit tungod kini sa paspas nga pagbuga ug carbon dioxide ug uban pang mga element ug kemikal diin nagpasamot ug nagpapaspas sa pag-init sa kalibutan ug pagkausab sa klima. Gawas pa kini sa lain laing kahimuan nga nagguba sa kinaiyahan sama sa pagbungkag sa kabukiran ug kalasangan.
Kini nga mga reyalidad mao ang gipanghingusgang batukan sa mismong mga kagamhanan gawas pa nga kini ang pina ka obligasyon nila – ang panalipdan ug isegurong luwas ang katawhan ug ang kinaiyahan.
Apan sa laing bahin, samtang paspas ang nagkalain-laing grabeng kalamidad hatud sa pagkaguba sa kinaiyahan ug pag-init sa kalibutan, daw gipakawalay-bili man sa mga hingtungdang ahensya ug mismo sa kagamhanan ang obligasyon niini ngadto sa katawhan. Managsukwahing lakang ug balaudnon ang gipatuman. Mipasa ug balaudnon sama sa Clean Air Act ug Clean Water Act ug uban pa nga nag-ingong prayoridad sa kagamhanan nga tagaan ug balanse ug luwas nga kinaiyahan ang iyang katawhan ug panalipdan ang mismong kinaiyahan. Apan, paspas usab kini nga mi-aprobar ug mga proyektong maoy mobutang sa katawhan diha sa labihan nga peligro, sama sa pagmina sa bulawan ug coal, pagkonberter sa kalasangan ug kayutaan ngadto sa komersyal nga luna, lapad nga pagpamutol sa kakahuyan u gang pagtukod sa mga planta sa elektrisidad nga diin sugnuran ug Coal. Ang coal usa ka mineral sama sa bulawan nga kutkuton ilawom sa yuta ug isugnod kini sa planta aron nga makamugna ug elektrisidad.
Dayag sa tanang pagtuon nga walay limpyong coal. Hinoon, momugna kini ug mga delikadong kemikal diha sa hangin, yuta, dagat, katubigan nga diin dili lang moguba sa kinaiyahan kundi hangtud na sa kinabuhi sa katawhan.
Ang paspas nga pagtukod sa coal-fired power plant, sama sa 300MW sa Ozamis City, 540MW sa Kauswagan, Lanao del Norte ug 20MW sa Iligan City maghatag ug dakung kadaot sa Panguil ug Iligan Bay nga diin kadaghanan sa mga naninumuyo niining maong mga dapit ug probinsya naa ang panginabuhian sa dagat ug agrikultura.
Busa ang Coal Resistance (CORE) Movement, nag-awhag sa tanang katawhan sa pagpakita sa ilang pagsupak sa tanang Coal-fired power plants ug Coal projects sa Pilipinas sa Lanao del Norte, Misamis Occidental , Ozamis City ug Iligan City.
Molunsad ug Martsa Batok sa Coal Projects ang CORE Movement agig pagpakita sa pagsupak sa mga yanong katawhan ug mga sector sa katilingban niining maong mga proyektoha. Ang Martsa manukad sa Lala, Lanao del Norte hangtud sa Iligan City, petsa 20 hangtud 24 sa Hulyo, 2015. Sa petsa 19 adunay usa ka Forum sa Maranding, Lala, Lanao del Norte, ala una sa hapon ang takna sa Jurassic Park; sa petsa 23 sa buntag mpahigayon kini ug protesta atubangan sa coal plant project site sa Libertad, Kauswagan, Lanao del Norte; petsa 24 sa hapon mahitabo usab ang usa ka aksyong protesta sa atubangan sa Lafarge Cement sa Kiwalan, Iligan City. Uban ang mga katawhan ug kahugpungan gikan sa lain-laing dapit sa Mindanao.
Giawhag ang tanang katawhan nga mahigugmaon sa luwas nga kinaiyahan ug luwas nga katawhan sa pagsuporta ug pagsalmot sa Climate Walk: A 92-KM Coal Resistance March.
Dungan sa Pagsupak mao ang Pagduso sa Pagpakusog sa mga Renewable nga tinubdan sa elektrisidad ug ang Pagnasyonalisa sa Industriya sa kuryente.
Maghiusa kita ug Ipakita ang atong Pagsupak!
Kauban,
Remo Fenis
CORE Movement, Secretariat Head
20
