ZAMBOANGA CITY (Mindanao Examiner / June 10, 2012) – Nabigla ang publiko sa malaking pagkatalo at kahihiyang dala nito matapos na makamit ni ‘Desert Storm’ Timothy Bradley ang korona sa laban nito kay Pinoy boxing champ Manny Pacquiao sa Las Vegas.
Todo naman ang dasal ni Mommy Dionisia, ang ina ni Pacquiao, at mahigpit ang pagkakahawak nito sa kanyang mga rosaryo habang nagdarasal ng todo sa kanilang mansion sa General Santos City sa paniwalang malaki ang maitutulong nito sa laban ng Pambansang Kamao.
Ngunit hindi na umubra ang mga dasal at pagtawag nito sa ibat-ibang santo at napaiyak na lamang at himatayin ng malaman ang pagkatalo ng anak.
Dismayado rin ang lahat ng pamilya at kaanak ni Pacquiao na tila hindi nakatulong ang pagiging bible preacher nito sa kanyang laban.
Umani naman ng batikos ang desisyon mula sa maraming tagahanga ni Pacquiao na nanood sa wide screen sa gym ng General Santos. Gayun rin sa Cotabato at Davao na kung saan ay solido ang suporta ng publiko kay Pacquiao.
Halo naman ang opinyon ng mga Pinoy sa naging desisyon ng mga hurado sa 12-round championship fight na ginanap sa MGM Grand. Maging ang asawa ni Pacquiao na si Jinky ay halos hindi makapaniwala sa nasaksihan – shocked pa ito ng mapaling sa kanyang mukha ang camera sa arena.
“Matanda na si Manny at hindi nga niya napabagsak si Bradley,” ani Pete Santiago, tricycle driver sa Zamboanga na nanood ng laban sa isang tindahan.
Mistulang ‘ghost town’ ang maraming lugar sa Mindanao habang nagbabanatan sina Bradley at Pacquiao.
Sa Zamboanga City ay tutok na tutok naman ang maraming pamilya sa harapan ng kanilang telebisyon. At halos hindi magkanda-ugaga sa sigaw at palakpak sa tuwing makakapuntos si Pacquiao taban kay Timothy Bradley, ngunit naiiba ito ng lumabas na ang desisyon.
Kapuna-puna rin ang kahabaan ng Don Alfaro street na nagdudugtong sa ibat-ibang barangay sa Zamboanga City na dati-rati ay mabigat ang traffic ay halos mabibilang na lamang ang mga motorista.
Maging ang mga restoran at hotel ay nagpalabas rin ng live fight ng laban ni Pacquaio-Bradley, ngunit hindi naman gaanong napuno ang mga ito dahil na rin sa mahal na singil – P100 hanggang P150. (Mindanao Examiner)
20