DIPOLOG CITY (Mindanao Examiner / Apr. 26, 2013) – Mihatag ug usa ka dakung pahimangno si Dipolog City Councilor Atty. Rubencio Legorio ngadto sa mga katawhang botante alang sa kaayohan sa matag usa atol sa usa ka pagpakigpulong niini didto sa barangay Sta. Filomena Covered Court ning dakbayan sa Dipolog.
Matud pa ni Legorio nga usa sa angay’ng buhaton sa usa ka botante mao nga, dili modawat ug kuwarta gikan sa mga kandidato gumikan kay daghan na karong mga peke nga mga kuwarta nga nanggawas.
Angayng hinumdoman sa tanan nga maposasan gilayon sa pulis kung masakpan ang usa ka tawo nga nanag-iya ug fake-money. Busa angay kining itisok sa alimpatakan sa matag botante.
Laing pahimangno usab sa konsehal mao nga magdala ug balon (pagkaon ug tubig) sa adlaw sa eleksyon aron dili na mohawa pa sa linya aron dili mapulihan sa laing tawo nga kaubang nagapila usab. Pagkahuman ug kaon gikinahanglan nga manghinaw aron walay pagkaong mamilit sa kamot gumikan kay basig mamilit usab kini ngadto sa balota nga mao’y hinungdan unya nga dili na madawat sa Precint Count Optical Scan kon PCOS machine ug masayang unya atong mga boto.
Lakip sa gitambag usab si Legorio mao nga magdala na lang ug lingkuranan aron dili bati-on ug kakapoy agi sa pagtindog sa panahon nga maglinya.
Magdala usab ug payong aron maprotektahan ang atong ulo gikan sa kainit sa adlaw ug aron malikayan ang heat-stroke o sa ulan ba kaha gumikan kay dili man karon matagna ang pag-ulan gumikan sa Climate Change.
Subay sa mga bulawanong tambag ni Atty. Legorio, nalipay ang inahan ning dakbayan Mayor Evelyn Uy gumikan kay makatabang kini sa mga botante atol unya sa adlaw sa pinili-ay.
20