CEBU -Giagda ni Presidente Benigno Aquino ang mga negosyanteng Kastila nga mamuhonan sa Pilipinas nga tungod sa daghang nahimo sa iyang administrasyon sa larangan sa ekonomya ug sa tinuoray nga pagbatok niya sa mga anomaliya sa nasud, usa na kini ka investment haven sa Asya.
“Tulad ng magandang ipinamalas ng pagbangon ng ekonomya ng Espanya, naniniwala ako na ito ang angkop na panahon upang anyayahan kayong mamuhunan sa isang matatag na ekonomya,” matud pa ni Aquino sa Networking with the Philippine Business Delegation nga gipahigayon sa Madrid, Espanya.
Sa pag-awhag sa mga imbestor, gipasigarbo sa Presidente ang record nga lig-ong paglambo sa ekonomya sa nasud sukad niadtong tuig 2010 hangtud 2013 diin 6.3 porsiyento ang natalang average growth sa Pilipinas.
Apil na usab niini ang investment grade status gikan sa Moody’s, Standard and Poor’s ug Fitch Group ug bisan ang Global Competitiveness Report sa World Economic Forum nga nag-ingon nga ang Pilipinas usa na ka lig-on nga destinasyon sa mga mamuhonan.
Bisan ang ubang publikasyon ug kasaligang mga organisasyon ang nag-ingon nga ang Pilipinas ang “Asia’s bright spot” o di kaha “Asia’s rising tiger.”
Gitumbok usab ni PNoy nga ang gihimo niyang pagpaningkamot nga sumpuon ang mga anomaliya nga gi-paresan sa pagputol sa “red tape” ang hinungdan mao nga nahimong dali alang sa mga negosyante nga mamuhonan sa Pilipinas, samtang ang mga reporma sa liberalisasyon sa mga industriya mag-abli og dugang nga potensiyal nga pamuhonan.
Matud pa sa Presidente nga ang katawhang Pilipino ang pinaka-dakung katigayunan sa nasud mao nga nakatutok ang administrasyon niya sa pagpalambo sa kinabuhi sa pinaka-kabos sa nasud.
Dugang pa ni PNoy nga nagmalampuson ang gobyerno sa pag-uswag sa kahimtang sa kinabuhi sa may 2.5 milyong Pilipinong kabos ug nakatutok karon ang gobyerno sa pagduso sa patakarang ipalayo sa kakabos ang katawhan aron dili magpabiling timawa.
20