‘Mga Kuskos-Balungos’ ni Jun Ledesma – The Mindanao Examiner Regional Newspaper

Mga Sulat Gikan sa Davao

Nagareport na ko sa karera sa politika ni Pangulong Rodrigo R. Duterte gikan sa una pa lang gyud niyang adlaw sa pagsulod sa natad sa politika isip tinudlo nga Bise Mayor sa Davao City. Kaming mga gagmayng peryodista sa lokal nga komunidad nga nakatariya sa City Hall masuod gyud sa maglingkod sa posisyon sa pagka Mayor, mga pangulo sa mga departamento ug mga staff nga naka-assign sa iyaha. Masinati namo sila sama sa among palad.

Ilis-ilis ra ang mga pangulo sa mga departamento depende sa maglingkod nga Mayor ug kini ang kamatuoran kang Mayor Rodrigo ug sa iyang anak nga si Inday Sara. Ang nakalahi lang niini mao si Presidential Assistant (PAS) Christopher ‘Bong’ Go isip personal assistant sa nahauna nga nagapadayon gihapon hangtud karon. Kining pagkasuod nagapadayon ug ninglungtad tungod kay si “Bong”, nga maoy gusto niyang angga, kasaligan gyud kaayo ug hugot nga maunongon ug nakahibalo sa utlanan sa iyang katungdanan ug responsibilidad.

Kini nga hisgotanan ninghatod kanato sa isyu mahitungod sa “frigate contract” o “kontrata sa prigata” o bapor de-gira nga ang on-line media Rappler gustong kutawon aron mahimong unos aron makapanimalos sila kang Pangulong Duterte nga maoy ilang gipasanginlan nga nagpaluyo sa desisyon sa Securities and Exchange Commission sa pagsira sa ilang operasyon isip media. Sa tinud-anay lang, ang mga personahe nga nalambigit sa kaluha nga kontrobersya ug maoy ninghimo sa mga desisyon pulos mga tinudlo sa administrasyong Aquino. Ang kontrata sa prigata napirmahan na sa wala pa makatungtong si Duterte sa Malacanang samtang upat sa lima ka SEC Commissioners nga ningdesisyon sa pagsira sa Rappler mga tinudlo gihapon ni Aquino.

Demodo, ang pagguroy sa pangalan ni Presidential Assistant Bong Go ug paglambigit kaniya sa kontrata sa prigata usa ka aksyon nga puno og malisya. Hokus-pokus nga pasangil ni sa mga desperadong magsusulat sa Rappler. Nagtuo sila nga kun tirahan nila si Bong Go, si Duterte ang masakitan. Ilang gibale-wala ang kamatuoran nga bisan si Vice Admiral Ronald J. Mercado, ang gipulihan nga Hepe sa Philippine Navy, ningdiklara nga si Bong Go way labot sa negosasyon sa makontrobersya nga kontrata sa prigata nga natapos ug napirmahan na sa ning-aging administrasyon. Bisag asa nimo tan-awon, giguroy lang si Bong sa unos sa sulod sa tasa sa tsa tungod sa gahian ug masuklanon nga pagtuo sa Rappler nga may labot si Duterte sa pagsirado nila. Layo ra gyud ni sa tinuod.

Ang papel ni Bong Go klaro kaayo ug si Pia Ranada sa Rappler angay nga nakahibalo niini. Isip PAS siya usab ang nagadumala sa Presidential Management Staff nga ang nag-una nga trabaho mao ang pagdawat sa mga reklamo nga ginapadangat sa Opisina sa Presidente pinaagi sa 8888 electronic window, mga sulat ug personal nga pag-asoy sa mga lungsoranon. Kini nga opisina mao ang moduso sa mga reklamo ngadto sa mga hingtungdan nga departamento sa gobyerno. Ang reklamo bahin sa kontrata sa prigata nga gipadala ngadto sa Malacanang ug giendorso ngadto sa Defense Department usa lamang sa mga daghan kaayong isyu nga ginaendorso ngadto sa DD sumala sa nalatid na nga sistema ug batasan. Nan, nganong aduna may kuskos-balungos?

Sa estilo sa pagsulat ni Pia, abi gyud nimo og hadlok gyud kaayo siya kang Pangulong Duterte. Mora og gusto niyang ipalabas sa publiko nga ang pagsira sa Rappler usa ka hulga sa press freedom o kagawasan sa pamahayag. Layo ra gyud ni sa tinuod. Libo-ka-libo ka mga gul-anan sa media ug ang mga journalists sama kang Pia ug Ressa lingaw kaayo sa ilang kagawasan nga walay sama. Pagsumpo sa kagawasan sa pagpahayag? Ang ilang kagawasan ug sa uban nga mga taga media, tinuod o mini, nga nagaapil-apil sa ilang mga walay hinungdan nga mga rallies ang pinakaepektibong argumento nga manghimakak sa ilang akusasyon.

Ang gihimo unta ni Pia mao ang personal nga pagdala sa kaso ngadto sa Pangulo. Wa koy pagduhaduha nga bisan sa mga paglatigo nga ilang gihimo sa Presidente, si Duterte, sa iyang personal nga kapasidad, mangita og pamaagi nga matabangan sila pinaagi sa pagtul-id sa legal nga mga kahuyang kun diin morag nataop ang Rappler sa tae nga lawom pa sa taga tuhod. Angay nga kahibalo si Pia niini kay di ba siya tong bag-ohan nga peryodista nga gipunit gikan sa kanal sa kandidatong Duterte ug sa iyang “sidekick” Bong Go? Nahulog si Pia sa kanal samtang nagreport sa kampanya sa Davao City. Gikanselar ni Duterte ang maong bahin sa kampanya aron dalhon sa ospital ang naluya nga peryodista ug wa niya biyai si Pia hangtud nga segurado na ang kandidato nga maayo ug baskog na ang peryodista.

Hinoon, nangagi na man na, kaniadto pa. Basig nakalimtan na ni Pia. (Jun Ledesma)