PAGADIAN CITY (Mindanao Examiner / Aug. 27, 2012) – Niyanig kanina ng lindol ang lalawigan ng Davao Oriental ngunit wala naman inulat na sugatan o nasirang mga gusali sa 3.3 magnitude na naitala ng Philippine Institute of Volcanology and Seismology.
Natunton ang sentro ng lindol sa bayan ng Cateel at tectonic ang sinasabing pinagmulan nito at naitala dakong alas 5.48 ng umaga.
Kamakalawa ng gabi lamang inuga rin ng malakas na lindol ang lalawigan ng Sarangani at naitala ito sa 6.6 magnitude sa Richter scale na siyang pamantayan sa lakas ng pagyanig na naganap dakong alas 11.05 ng gabi.
Ayon sa mga dalubhasa ay tectonic rin ang dahilan nito at naramdaman sa Davao City at naitala ang lakas nito sa Intensity 4; sa General Santos City, Intensity 3, at Koronadal City, at bayan ng Tupi at Polomolok sa South Cotabato na Intensity 2.
Maging sa Zamboanga City ay naramdaman rin ito.
Ang Pilipinas ay nasa tinatawag na “Pacific ring of fire” na kung saan ay nasa ilalim ng karagatan ng bansa ang napakaraming mga bulkan na isang dahil sa patuloy na pagyanig sa ibat-ibang bahagi ng Mindanao, Luzon at Visayas. (Mindanao Examiner)
20