ZAMBOANGA CITY – Isang babaeng teenager na inulat na nawawala ng kanyang pamilya noon pang Agosto ang brutal na pinatay matapos na madiskubre ang naaagnas nitong bangkay di-kalayuan sa kanilang lugar sa Zamboanga City.
Nakilala ang biktima na si Marlyn Mariano at natagpuan ng tiya nitong si Manuela Atilano habang nangunguha ng kahoy sa masukal na lugar sa Barangay Sinunuc matapos na mapuna ang bulok na amoy sa naturang lugar.
Inakala pa umano ng biyuda na patay na hayup ang nangangamoy, ngunit laking gulat na lamang nito ng malamang bangkay ng tao ito at lalo pang nagimbal ng mabatid na ito ang nawawalang pamangkin. Putol rin ang kamay ng dalagita, ayon sa matanda.
Huli umanong nakita si Marlyn kasama ang isang grupo ng mga kabataan na gumagamit ng rugby, subalit hindi naman mabatid kung may kinalaman ang mga ito sa pagpaslang sa babae na posibleng inabuso rin.
“Nangunguha ako ng kahoy para pang-gatong at may naamoy akong mabaho at hinanap ko ito sa akalang patay na hayup lamang, pero bangkay pala ni Marlyn iyon at wala na rin ang isang kamay niya, pinutol ang kamay,” ani ng tiya. (Mindanao Examiner)
20