LEYTE – Usa ka lukop sa kalibutan nga non-governmental organization ning lalawigan ang naka-agni pagpalihok og mga pundok sa katawhan para mahimo kini sila nga mga malambuong komunidad sa ilang mga kaugalingon para ra sab sa ilang kaugalingong mga kaayohan ug mga intereses.
Ang PLAN International, kansang lima-ka lungsod nga ginsakupan naglangkob sa upat ka lungsod sa Panaon Island, sa Liloan, San Francisco, Pintuyan, San Ricardo, ug ang Libagon, naka-aghat pagtukod sa kapin sa dosena nga mga Barangay Water Sewarage Associations (BAWASA) ug mga money savings groups, nagkanayon si Jennefer de la Cruz, PLAN Unit Manager sa probinsiya.
Kining mga grupoha na-ugmad ug napalambo sa paglabay sa panahon aron pagtubag sa tino nga panginahanglan, dugang pa sa mga inisyatibo sa PLAN nga napahimuslan sa katilingban diin gitutokan niini ang kaayohan sa mga 4,000 ka mga bata nga ilang mga sponsored children, si Dela Cruz miingon.
Matud niya nga ang padayong presensiya niining maong mga pundok magsilbi nga maoy ilang kabilin karon nga taligawas na sila sa lalawigan gunad sa Hunyo, 2016. Niya pa nga sa Mindanao na ang sunod nilang assignment, apan wala pay tino nga detalye pagka karon.
Si Leah Payud, PLAN Area Supervisor, namahayag nga gawas sa pagbiya sa mga na-organisar na nga mga grupo, gikalipay sab nila nga sukad sa 1998 kanus-a unang na-establisar ang PLAN sa lalawigan, ang naasoy nga NGO nakatandog nag ubay-ubay nga mga kinabuhi, ug nakatabang pagtisok sa mga bililhong birtud ug mga values diha sa ilang gipang-sponsoran nga mga kabataan.
Gitumbok niya ang mga nanagko na nga mga kabataan nga giamuma sa PLAN nga karon mga young professionals na, ug kini sila nga mga batan-on na karon nanaad nga padayonon nila pagpakaylap ang ilang nakat-onan ubos sa PLAN, sama sa pagtudlo sa mga batakan nga mga pribilihiyo ug mga katungod sa usa ka bata, sa iyang protection ug edukasyon.
Sa mosunod nga duha ka tuig nga nia pa sila sa pobinsiya, padayon ang PLAN sa naandan niining mga gimbuhaton sa mga programa ug mga proyekto nga nagtumong alang sa kabulahanan sa mga kabataan ug sa mga komunidad diin kini sila nagpuyo, saysay pa ni De la Cruz.
Duha ka mga infrastructure projects ang gilaraw na, una mao ang usa ka Day Care Center sa Pintuyan, ug lain pa mao ang classroom sa bag-ong Libagon National High School, si De la Cruz usab miingon. (Marcelo Pedalino)
20