CEBU – Subay sa Downtown Revitalization Project sa kagamhanan ning dakbayan nga gipangulohan ni Cebu City Mayor Michael Rama, natukod ang Night Market diha sa pinaka-karaang dalan sa tibuok Pilipinas nga mao ang Colon Street.
Ang kalihokan nga anaa na sa ika-walong tuig karon gipahigayon ka-upat ka higayon sulod sa usa ka tuig. Kini naglangkob sa bulan sa Enero alang sa selebrasyon sa Sinulog, sulod sa tunga-tunga sa bulan sa Mayo hangtod na sa tibuok bulan sa Hunyo alang sap ag-abli sa klase ug sa pagselebrar sa Cebu Business Month, sulod sa bulan sa Agosto alang sa paghandom sa Ramadan, ug sa hinapos sa bulan sa Nobiyembre hangtod na sa bulan sa Disyembre alang sa pagsaulog sa Pasko ug Bag-ong Tuig.
Sa pakighinabi sa BARUGG News kang George Chu, ang gitahasan ni Rama nga mangulo sa Downtown Revitalization Project gibutyag niini nga molungtad hangtod na sa Enero 16 ang ika-upat nga pagpahigayon sa Night Market nga pormal nga gisugdan niadtong Nobiyembre 15 adlawng Sabado ning tuiga.
Kahinumdoman nga nagsugod ang programa niadtong tuig 2007 tungod sa inisyatiba ni Mayor Rama nga maoy kanhi Bise Mayor sa maong tuig. Kini usab human sa malampusong pagpahigayon sa Association of South East Asian Nation Summit nga gipahigayon ning syudad sa susamang tuig.
Tumong niini nga mabalik ang kanindot sa Colon Street nga maoy sentro sa patigayon, komersyo ug industriya kaniadto dinhi sa Sugbo. Magsilbi usab kining sama sa Divisoria sa Manila nga maghatag ug oportunidad sa tanan nga makapamalit ug mga baratong kagamitan sama sa kitchen utensils, household needs, garments, school supplies, mga lamiang pagkaon ug uban pa.
Si Zaira Sarip, usa lamang sa mga regular nga namaligya sa Night Market sukad sa pagsukod niini nagkanayon nga, “Pasalamat mi ni Mayor Rama kay naa ni nga programa naa among hanapbuhay ug makatabang pod mi sa mga mamalit kay barato ug maayo pod among baligya kompara sa mga Malls.”
Dugang ni Sarip, kinsa namaligya ug mga ready-to-wear nga mga kagamitan nga mas maayo ang kalihokan karon kay mas hawan ang dalan, daghang mga kapolisan nagpatrolya ug mas kusog ang halin kay daghang tawo ug hapit na ang Pasko.
Samtang gihingusgan usab sa dakbayan nga mapatuman ang kahapsay ug siguridad alang sa pagpahigayon sa operasyon sa Night Market nga masugod sa alas-Sais sa gabii ug molungtad na hangtod sa ala-Una sa kaadlawon.
Motabang usab sa mga kapolisan ang Cebu City Unified Security Group, mga tanod sa barangay, ug mga intelligence network sa pagmonitor ug pagpatrolya sa naasoy nga dapit. (Greggy Jiggs P. Senados)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com and http://www.mindanaoexaminer.net
20