Ito ang karaniwang tanawin sa Zamboanga, ngunit dedma lamang ang Traffic Section ng lokal na pulisya at City Hall, gayun rin ang Land Transportation Office sa walang humpay na paglabag ng batas-trapiko ng mga abusadong tsuper ng jeep at bus. (Mindanao Examiner Photo)
ZAMBOANGA CITY (Mindanao Examiner / Apr. 3, 2014) – Tila ‘ningas cogon’ lamang ang operasyon ng Land Transportation Office at Traffic Section ng lokal na pulisya sa kanilang kampanya kontra motorista na lumalabag sa batas-trapiko sa Zamboanga City.
Kaliwa’t-kanan ngayon ang paglalagay ng checkpoint, partikular sa gabi, ng mga kawani ng LTO at traffic policemen, upang mahuli ang mga lumalabag sa batas, partikular ang mga nakasakay o pasahero ng motorsiklo na walang suot na helmet o kaya ay walang dalang lisensya at iba pa, at gayun rin sa mga nagmamaneho ng kotse at mga sasakyan.
Sa kabila ng pasulput-sulpot na operasyon nito ay tila bulag naman ang mga awtoridad sa mga pampasaherong jeep at mini-bus na walang humpay ang paglabag sa batas-trapiko.
Sa araw-araw na tanawin dito, kapuna-puna ang mga bumibiyaheng overloaded jeep at bus at bukod pa ang maraming mga pasaherong nakasakay sa ibabaw ng mga bubungan nito, subalit sa kabila nito ay dedma lamang dito ang mga awtoridad.
Hindi lamang peligro ang dulot nito sa mga pasahero kundi ang tahasang kawalan ng respeto ng mga tsuper sa naturang batas. Naunang idinahilan ni LTO regional director Aminola Abaton na kulang sila ng tauhan kung kaya’t hindi maaksyunan ang mga paglabag na ito.
Maging ang City Hall at ang Traffic Section ng pulisya ay wala rin aksyon sa matagal ng problema sa mga abusadong tsuper. (Mindanao Examiner)
20