NGANONG KONTRA MAN kaayo ni Pia Ranada sa Rappler ang plano sa Philippine News Agency nga mosulod sa usa ka kasabotan nga magbinayloay og mga balita ug mga feature article sa Sputnik news agency sa Russia? Tungod sa utang kabubut-on ngadto sa Omidyar Network nga nakabase sa US ug namuhunan sa Rappler, di makatago si Ranada sa iyang gipalabi ug nagpasumbingay pa siya nga ang ideya sa PNA nga makigbayloay og mga balita ug opinyon sa Sputnik di makaayo sa Pilipinas labi na gyud sa iyang seguridad.
Tungod sa iyang pag-insisister nga ang Sputnik kabahin sa makinarya sa propaganda sa Russia, gibanhaw na hinoon sa Rappler ang eskandalo sa papel sa Omidyar Network sa pag-ataki ug pagdeestabilisa sa gobyerno sa Ukraine nga ningresulta sa pagpukan ug pagpalagpot kang Presidente Yanukovych, usa ka lider nga pro Russia. Kun atong mahinumdoman, ang ON nabandera kaayo sa eskandalo nga lambigit sa iyang dakong puhunan nga dolyares sa Rappler nga ningresulta sa pagbawi sa iyang lisensya. Kini nga ahensya sa media nagpakaaron-ingnon ug nagpuparada sa iyang kaugalingon nga 100% korporasyong Pilipino apan ang kamatuoran ning-isyu siya og mga Philippine Depository Receipt nga nagpakita nga ang ON maoy nagamando sa iyang negosyo ug mga palisiya sa mga editoryal. Natural, ang pinakasayon nga pamaagi sa pagbadbad gikan sa pagkaunay sa kaugalingong bitik mao ang pagluwat sa ON sa mga PDR ug pagpalusot nga ang maong puhunan “donasyon” ngadto sa iyang mga staff nga Pilipino.
Sa ato pa, ang katapusan nga angayng himoon ni Ranada sa Rappler mao ang paghatag og sermon nga “way ganansya ang maong pagbinuligay ug pagbinayloay og mga balita gawas sa mga pagtulon-an gikan sa usa ka nasud nga nagmalampuson sa pag-umol sa mga bakak aron mahimong mga kamatuoran…”
Isog ni nga mga pulong gikan sa usa ka social news network nga nalambigit sa pagsabwag og mga kataw-anan ug hangalhangal nga mga estorya bahin sa Davao Death Squad kuno ug grabe nga gipaburot nga mga numero sa mga biktima kuno sa Extra-Judicial Killings. Sobra ra kaayo sila kamapahitas-on sa ilang pagtuo ug pagsugyot nga sila ra, ug dili ang mga staff ug mga magsusulat sa PNA, ang adunay mga kredensyal ug abilidad sa paghupot sa responsibilidad sa pagmonitor ug pag-ila kun unsa ang mga pakubit ug mga peke gikan sa mga nagkalainlaing tinubdan sa media.
Daghan ta og angay nga masayran ug makat-onan gikan sa Russia ug kini nga plano sa pagbinayloay ug mga balita ug ubang mga artikulo moresulta sa mas maayo ug mas lawom nga pagsabot sa mga isyu nga politika, ekonomiya ug sosyal sa Russia nga gihikaw kanato hangtud karon. Nagpurol pa ko ug hangtud karon nga hapit na mahurot og panglarot ang akong buhok ug ang akong mga tuhod nagkurogkurog na, malabo pa gihapon sa akoa ang Russia ug ang mga katikaran sa sulod sa maong nasud.
Apan oo, sa ning-aging Oktubre, nakaabot ko og St. Petersburg, usa ka siyudad sa Russia sa kabaybayunan sa Baltic Sea. Ning-istar ko og duha ka adlaw sa masilakon nga siyudad. Ug akong ikasulti nga sa tinuod lang, swerte kaayo ko nga nakaabot ug nakataak niining sentro sa kultura, ekonomiya ug siyensya sa Russia. Dili ba diay madugangan ang atong kaalam kun makabasa ta og mga asuy ug makakita ta og mga video ug mga litrato sa mga butang sa sulod sa Russia ug sila bahin sa ato sa Pilipinas? Daghan ta og angayng matun-an sa usa’g usa ug kun ang Philippine News Agency dili modawat og puhunan gikan sa mga tinubdan nga kadudahan nagtuo ko nga ang atong pagbinayloay og mga balita walay epekto sa atong seguridad.
Lain pay ato, ang Sputnik news agency adunay mga sangang opisina sa Washington, Beijng, Singapore, London Cairo and Edinburg. Nan unsa may atong gikahadlokan? (Jun Ledesma)
20
