ANG MAKALILISANG nga trapiko nga nahiagoman sa mga motorista ug mga naglulinghayaw sa kadalanan sa Davao City sa ning-aging semana naghatag kanato og abanteng talan-awon sa kaulohan sa habagatan sa umaabot nga mga katuigan. Karon hinoon pwede pa nga iimposar ang pipila ka lakang sa pagpagaan sa problema nga namugna sa mga nagkalainlain aktibidades sa panahon sa Pasko. Mora og nakalitan tanan. Kadaghanan sa prinsipal nga kadalanan sa sentro sa siyudad giserado nga way pasiunang pagpahibalo. Kalibog ug kaguliyang ang nahitabo. Ang traffic control management angay unta nga nag-anunsyo bahin sa mga temporaryong kabag-ohan sa pagpadagan sa trapiko sa wa pa ug sa aktwal nga panahon sa kasaulogan ug segurado kong di mohikaw ang mga mantalaan ug mga sibyahanan og lugar ug panahon.
Wa makatabang ang mga pagkawot ug mga repair sa mga prinsipal ug sekundaryo nga mga dalan sa syudad. Pipila niini giserado o temporaryo nga gihimo og one-way. Di nako masabtan ngano nga ang mga konstruksyon, pag-ayo ug pagbuhos og pundasyon nga semento dugay ug hangtud sa kahangturan. Way kausaban ang kahanas ug kapaspas sa trabaho. Makahibulong kaayo kay sa China, USA, Singapore ug uban pang nasud, ang pagtukod ug mga dagkong imprastruktura mahuman sa pipila ka bulan ug ang pagrepair ug pagrehab mahuman sa pipila ka adlaw. Unta ang gobyerno sa syudad ilawom sa liderato ni Mayor Inday mopataas sa naandan ngadto sa mas taas pa nga ang-ang, sumbanan ug sukdanan sa paghimo og trabaho ug kalidad sa resulta sa mga trabahong publiko. Naa nay mga baligya nga materyales nga mopauga sa semento og unom ka oras imbes saysenta diyas ug mga materyales nga pangrepair nga mauga sa sulod sa tulo ka oras imbes trayenta diyas.
Kini nga kahasol parte sa atong kinabuhi sulod sa pipila ka bulan ug basin gani modugay og pipila ka tuig. Di ni malikayan nga resulta sa pag-uswag ug paglambo. Kini ang bili sa kauswagan ug kalamboan. Naobserbahan nato sa ning-aging lima ka tuig nga halos naglumba ang mga naghimo og mga condominium ug mga balay sa mga subdivision. Kadaghanan sa mga gihimo tag-as nga mga bilding. Ang Davao City di pwede nga maghuot tungod sa kalamboan ug angay natong dayegon si Mayor Inday Sara sa paggiya ug pag-umol sa liderato sa rehiyon aron magkahiusa ug magtinabangay padulong sa mas makatarunganon ug hiniusang pagplano ug pagpalambo sa tibuok rehiyon. Ang mga industriya kinahanglan nga ikatagkatag ug di angay nga sundon ang sayop sa Metro Manila Development Authority nga hakog kaayong ninghakop ug ningtapok sa mga industriya ug mga trabahoanan sulod ug sa palibot sa Metro Manila.
Ang nahitabo sa ning-aging semana dili normal apan naghatag kini natong mga Dabawenyo og ideya kun unsa kalisud ug kagrabe ang trapik nga di molihok sama sa adlaw adlaw nga hitabo sa Metro Manila. Ang kalainan dinhi sa ato kay ang mga nangulo sa politika nagkahiusa sa pagplano sa tibuok rehiyon bisan og nagkalainlain ang mga kampo sa politika. Pananglitan ang Hugpong ng Pagbabago nga gipangulohan ni Mayor Inday Sara. Dugang pang bentaha sa rehiyon sa Davao mao ang mga konstruksyon sa mga dagkong imprastruktura nga mopakusog sa mga koneksyon sa mga probinsya, kalungsoran ug kasyudaran sama sa dakong dalan nga panglaktod, riles sa treyn, tulay nga mosumpay sa Samal ngadto sa Davao del Norte ug Davao City, ug ang karsada nga magsubay sa kabaybayunan sa Davao City.
Ang populasyon sa syudad sa Davao paspas kaayong nagtubo ug atong gikalipay ang desisyon sa Davao City Water District sa pagpangandam sa pagdako sa panginahanglan sa tubig sa umaabot nga henerasyon pinaagi sa pagkonekta sa alternatibong tinubdan. Ang proyekto sa bulk water mokostar sa DCWD ug sa iyang partner, ang Apo Agua Infrastructura, og P12.5-bilyon. Magsugod pa ang Apo Agua sa iyang proyekto samtang nakab-ot na sa DCWD ang iyang mga target.
Bilib ko sa kalagsik ug kaabtik sa liderato sa gobyerno sa syudad sa Davao ug sa mga institusyon sama sa DCWD. Dili na ko mahibulong nga ang pagtubo sa ekonomiya nagpabilin nga pinakataas, pinakalig-on ug pinakamalahutayon sa tibuok nasud. Nagaani kita karon sa wa pa gyud sukad mahitabo nga paghunat ug pagbusikad sa ekonomiya sa syudad nga laboratoryo niadto sa komunistang pag-alsa, mga krimen sa sindikato sama sa kartel sa droga, kidnapping ug terorismo.
Gisalo ning tanan ni Mayor Rodrigo R. Duterte sa pagsugod niya sa iyang karera sa politika. Determinado siyang ningsungasong, ning-imposar og mga lakang nga pangdisiplina, nanimuyo nga sulondon ug wa madugay ninghimo sa syudad sa Davao nga pinakanindot nga puy-an sa tibuok Pilipinas, pinakamalinawon ug pinakamapinanggaon sa kabataan, pinakamahigalaon sa patigayon ug mga negosyante ug sa sulod sa pipila ka tuig nahimutang sa usa sa napulo ka pinakamalinawong syudad sa tibuok kalibutan sa talaan sa Numbeo, ang institusyon nga nagaatiman ug nagahipos sa mga datos ug mga kasayuran bahin sa mga nasud.
Kining tanan nga mga buhing kamatuoran ug mga kalidad sa liderato sa Davao moalkontra sa way kalooy nga mga akusasyon ug komentaryo gikan sa mga kalaban sa politika ug dali ra ilaron nga mga institusyon ug sa ilang binayran nga mga personalidad sa media. Bisan pa, ang kredibilidad ug pagsalig sa katawhan kang Presidente Duterte nagpabilin nga pinakataas ug pinakamalahutayon samtang sa syudad sa Davao ang babayeng puthaw nagaentrada na sa natad sa nasudnong politika.
Mabungahong Bag-ong Tuig! (Jun Ledesma)
20
