ANG MAKAMATAY nga pagboto sa bomba sa sulod sa Mt Carmel Cathedral sa Jolo ningbuhi og usab sa mga dugoon ug makalilisang nga mga hulagway sa parehas kapintas nga pagpaboto og bomba sa San Pedro Cathedral sa Davao City. Kining patraydor ug mangtas nga ataki labi na sa usa ka balay alampoanan gikondenar sa mga relihiyon nga Kristiyano ug Islam ug ginahimo lamang sa mga tawong di normal ang pagtuo ug pangutok. Ang ataki sa katedral sa San Pedro ug sa Mt Carmel nahitabo panahon sa martial law.
Ang insidente sa Davao nahitabo sa panahon ni Marcos ug karon anaa na sab ning ataki sa simbahan sa Jolo. Ang trahedya sa Davao nahitabo sa panahon nga hapit na matapos ang martial law. Sa akong pangagpas, niining duha ka panghitabo, ang pag-implementar sa balaod militar dili hugot ug ang mga lakang sa seguridad kulang. Wa itago ni Pres. Rodrigo Duterte ang grabe niyang kasuko sa pagpamomba nga kaduha pa gyud gihimo, sa sulod ug sa gawas sa simbahan.
Ang nahitabo sa Jolo dapat nga maghatag og bug-at nga leksyon sa atong mga magbalantay sa balaod ug kalinaw. Ako mismo personal nga nakaobserbar sa mapasagaron nga kinaiya sa mga elemento sa kapulisan nga gitahasan sa pagbantay sa kahusay ug kalinaw sa Redemptorist Church sa Davao. Imbes moposte sila sa mga estratehikong lugar o maglakawlakaw nga usa-usa o paris-paris aron sa pag-obserbar sa palibot sa simbahan, tua hinoon sila nagpunsisok sa usa lamang ka suok nga landong ug nagsige og tabi o nagsige og text.
Sa akong pangagpas, ang mga bomba nga gipaboto sa Jolo lagmit dako kaayo kun ibasi sa gidaghanon sa mga namatay ug naangol ug kadaot nga nahimo. Kun hugot pa ang seguridad ang bomba di unta makasulod sa simbahan.
Kining tanan nangagi na. Human og lubong sa mga nangamatay dapat nga magpadayon ta og atiman sa mga samaron. Ang presidente ning-order og mas taas nga lebel sa alerto sa Jolo ug way hunong nga opensiba batok sa mga terorista mga mora og libre kaayo og panlihok, kidnap diri, kidnap didto, ma Kristiyano man o ma Muslim, langyaw o lokal, lalaki o babaye, bata man o hamtong. Ang kapulisan ug ang kasundalohan di angay nga mag-usik-usik sa ilang panahon sa paghunahuna ug pag-analisa kun ang mga naghimo og dautan mga ISIS o Abu Sayyaf, may motibo ba nga politikanhon o ataki sa terorismo. Mangtas ni nga pagpamatay ug kun kinsa man ang naghimo niini kinahanglan nga dili lung-an og lutos hangtud sa tumoy sa kalibutan ug puohon.
Angay nga ang pinakaugdang nga kusog sa pwersa sa gobyerno mao ang gamiton sa pagkombati ug pagdugmok niining maong han-ay sa mga kriminal kay ang kahuyang ug pagkawalay pagtagad moimbita og agresyon. Hunong mo sa trabaho nga part-time security guard sa mga kompaniya sa mina sa Tawi-Tawi. Dili ni mao ang katungdanan nga inyong gipanumpaan.
Naratipika na sa katawhan ang Bangsamoro Organic Law. Nagpakita kini sa pagka sinsero sa administrasyong Duterte sa pagtuman sa iyang gisaad nga paghatag og dugay na nga ginatinguha nga otonomiya sa parte nga gitawag niadto og autonomous region sa Muslim Mindanao. Turno na ni karon sa Moro Islamic Liberation Front sa pagdemonstrar sa iyang sinseridad sa pagtabang sa gobyerno sa paglutos sa mga namomba. Samtang ang Moro National Liberation Front, kinsang lider si Nur Misuari, lupig pay igsoon ni Presidente Duterte, ginatawagan sab.
Sinati kaayo nimo ang kada pulgada sa mga pulo ug dagat nga sakop sa mga probinsya sa Sulu ug Tawi-Tawi. Ning-abot na ang panahon nga angay nimong ipakita nga angay ka sa gihatag nga pagsalig gikan sa imong suod kaayo nga higala. Tabangi siya aron mapuo na ang tanang daotan nga naa nagtago sa imong rehiyon kay wa nay mas hayag pa nga panahon ug oportunidad kay sa karon sa pagpursige sa kalihokan nga pagpalambo sa imong lugar ug sa imong katawhan. (Jun Ledesma)
20
