BAG-O PA lang nga nagsulat ko og kolum bahin sa headline sa “Abante” sa Manila ug sa iyang website nga nagyamayama ug naghugawhugaw sa reputasyon ug integridad ni Energy Sec. Al Cusi, PNOC Pres. Reuben Lista ug TRANSCO Pres. Melvin Matibag. Natingala ko gilayon sa mga isyu nga ilang gipasangil batok kang Matibag nga sa akong tan-aw pwerteng layoa sa kamatuoran. Ang magsusulat sa headline ning-alegar nga ang Presidente saTransco nangayo kuno og milyones gikan sa mga kompaniya sa elektrisidad sa Mindanao aron kuno makonekta sa grid sa Transco sa Visayas. Ang headline nag-insister nga kuno si Matibag namugos nga hatagan siya og bahin sa bayad sa right of way gikan sa mga tag-iya sa yuta kun asa tukoron ang mga torre ug maagian sa kutay sa mga kable sa transmisyon sa kuryente.
Makahimuot ang dagan sa istorya. Nakahinumdom ko nga sa maong panahon nagwarning ko sa pagpangamang sa nagkalainlaing grupo sa politika, taong-simbahan, media ug mga pwersang ideyolohikal aron magkomplot nga dauton ang reputasyon ug integridad ni Presidente Rodrigo Duterte, ideestabilisa ang iyang administrasyon ug palagputon siya gikan sa Malacanang. Ang giasuy sa headline sa Abante pwerteng kataw-anana ug mora og gikan sa baba sa menos og utok kay wala man gyud bisan og usa ka pulgada nga kable nga mokonekta sa Visayas ug Mindanao ug ang mga power pylon ug mga kable sa National Transmission Corporation (Transco) dugay na nga naplastar sa ilang mga nahimutangan katuigan na ang ninglabay sa wa pa kalingkod ang mga tinudlo ni Duterte. Diha diha dayon naapsan nako nga dunay grupo nga tigpangguba nga nagmaskara ug nagpaka-aron-ingnon mga investigative journalist kuno bisan og ang tinuod mga sinuholan sa mga grupong may daotang interes.
Naay mga sakop sa oligarkiya nga gustong magpabilin nga magkumpayot sa nipis na kaayong lanot sa gahum ug impluwensya nga nahabilin sa nailisan na nga kurap nga administrasyong Aquino. Sa panultihon pa, gitestingan nila kun unsa kainit ang tubig ilawom sa rehimeng Duterte.
Wa ko masayod nga ang Presidente sa Philippine National Oil Company, kanhi Admiral Reuben Lista, gidaot sab diay sa maong grupo sa mga magsusulat ug sa maong peryodiko. Sayod man ta nga sakop ni Cusi sa Department of Energy ang PNOC. Agresibong demolisyon ang desinyo sa maliputon nga ataki sa reputasyon ug integridad sa mga opisyales sa mga ahensya ilawom sa DOE ug ni Cusi mismo. Kana lang kay wa gyud mailhi ang utok niini. Di nato malikayan ang konklusyon nga ang nagpaluyo sa bakak ug mapintas nga mga pamahayag grabe ang pagtulo sa laway tungod sa kaibog sa mga asset sa PNOC ug uban pang ahensya ilawom sa DOE.
Si Cusi, Matibag ug Lista biktima sa mga peke nga balita sa mga peryodiko ug social media. Gilansang sila nga mora na hinoon og molabas nga nag-atubang sila og mga kaso sa Ombudsman. Tungod kay wa silay koneksyon ug mga higala sa media gihimo na lang nila ang pinakakatapusang lakang: gihangyo nila ang NBI sa paghimo og imbestigasyon sa mga isyu nga gipasangil sa ila. Sumala sa akong nahibaw-an ang NBI wa gyuy nahipos nga impormasyon bahin sa bisag usa man lang ka kaso batok sa kang bisan kinsa kanila, ma kriminal o ma administratibo, sa Ombudsman man o sa Government-Owned and Controlled Corporations. Sa laktud nga pagkasulti ang bugtong nga tumong sa mga ataki nga gipunting kang Cusi, Matibag ug Lista mao ang pagdaot lamang sa ilang mga pangalan ug reputasyon isip opisyal sa gobyerno. Bisan unsaon nimo og tan-aw ang dagan sa istorya nga gisibya ug gimantala, pwede nimong pasakaan og kaso kriminal ug libelo ang mga nagsulat niini, ang radio nga ningsibya ug ang peryodiko nga ningmantala.
Sa pagpuli sa administrasyong Duterte kalit nga nabugto ang praktis sa pagpatay sa reputasyon sa mga opisyales sa gobyerno nga gipundohan sa mga tawong may impluwensya ug may pangalan aron hadlokon ang mga opisyales sa gobyerno ug mahuraw ug mosurender na lamang sa tanang gusto nila sa porma nga kontrata sa mga proyekto. Himoa lang ang tama ug legal ug seguroa nga ang imong kompaniya ug mga tawo nga nagrepresentar sa kompaniya lehitimo.
Makahinumdom mo ni Manny Pangilinansan nga magpabayad unta sa gobyerno og refund kuno nga balor og P3-bilyon isip baylo sa pag-uli sa Cure frequency ngadto sa NTC? Sa usa ka mubo nga pamahayag atol sa selebrasyon sa anibersaryo sa NEDA diin nagdeliber siya og pakigpulong ningsaad si Duterte nga iyang ipahiling sa mga BIR revenue investigator ang mga libro sa imperyo sa PLDT/Smart. Wa dangtig 24 oras si Pangilinan morag karnero nga ningtuman ug giuli ang frequency. Sa kaso ni Lucio Tan iyang gituman ang iyang katungdanan pagbayad og buhis ug nakadawat siya og pikpik sa abaga. Gidugangan pa gyud kini ni Duterte og kinasingkasing nga pagdayeg kaniya tungod sa iyang paghimo sa Philippine Airlines nga usa ka kompaniya nga takus modala sa bandera sa Pilipinas. Op kors kahibalo ta og unsay nahitabo sa gamhanan nga tag-iya sa Mighty Cigarrettes. Unsay akong tambag sa mga magpapatigayon nga gustong manlaktod: Ayaw inata pag-ayo ang inyong kapalaran ug likayi ang pagpanimpalad. (Jun Ledesma)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read And Share Our News: https://www.mindanaoexaminer.com
Mirror Site: https://mindanaoexaminernewspaper.blogspot.com
Digital Archives: https://issuu.com/mindanaoexaminernewspaper
See Media Rates: https://mindanaoexaminer.com/ad-rates
20
