KUN NAGLAUM KA og 15 ka bidders nga mosumiter og mga bid para sa ikatulong Telco apan tulo lang ang mosumiter ug ang duha madiskwalipika pa, matahap kang dunay salawayon nga nahitabo sa proseso sa bidding. Masihag ang proseso, sa panultihon pa, ug ako ningbilib sab sa mamugnaong estratehiya sa pipila ka abogado nga nagsapot og itom nga nagdirihe sa bidding committee. Sayo sa buntag sa sunod adlaw, ang tigpamaba sa Presidente, si Sal Panelo, ning-isyu og pamahayag nga mosangga sa Presidente gikan sa mga malisyoso nga akusasyon tungod kay ang provisionary nga ningdaog sa maong bidding mao ang UDENNA nga gikan sa Davao, pinuy-anan sa Presidente. Normal lang hinoon ni.
Wa pa gyud mahuman ang pagpangita. Ang mga sakop sa industriya nagapunting karon sa ilang mga pangutana sa Mislatel, ang behikulo nga gigamit sa UDENNA sa bid para sa ikatulong Telco ug napailawom kini karon sa seryoso ug detalyadong pagsusi. Mora og ang Mislatel, ang behikulo nga gigamit sa UDENNA ug China Telecom, dunay seryoso nga problema bahin sa pagkabalido sa iyang prangkisa. Nagsagol ang akong gibati bahin sa mga hitabo sa pagpangita og ikatulong Telco. Tungod kay taga Davao ko, nalipay ko sa pagkadungog nako nga ang UDENNA ang gideklarar nga probisyonal nga bag-ong magdudula ug ang haring gangis niini mao si Dennis Uy, taga Davao. Sa laing bahin, nagtrabaho sab ko niadto sa Philippine Telegraph & Telephone Corporation sa sulod sa 23 anyos ug ako ang nangulo sa sangang buhatan sa tibuok Mindanao. Napikas ang akong kasingkasing sa duha ka minahal, sa panultihon pa. Ang ako lang ikasulti, hinaut nga ang pinakahawod nga kompaniya ang modaog.
Nadiskwalipika ang PT&T tungod kay, matud pa sa National Telecommunications Commission, ang kompaniya wa daw kasinatian sa pagpadagan og network nga nasyonal. Gawas lamang kun ang mga sakop sa bid and selection committee wa pa matawo sa 1962 o mga bata pa sa gidugayon nga 56 anyos kun diin ang PT&T nagserbisyo sa tibuok nasud hangtud nga ang gobyerno ningmando nga ang mga Telcos moserbisyo na lang sa mga i-assign nilang rehiyon, dawaton nako ang ilang alegasyon nga ang PT&T way kasinatian sa pagpadagan sa ang-ang nasyonal. Apan layo ra kini sa tinuod kay hangtud karon, nagkanap ang fiber optic network sa PT&T sa Region IV-A, sa National Capital Region ug hangtud ngadto sa Pampanga.
Pwerte ra gyud untang sayona sa PT&T nga mokuha og partner nga taga laing nasud kun itandi nimo sa ubang aspirante nga wa pay dyes anyos o ZERO gyud ang kasinatian. Apan kun ibase sa iyang intensibo ug malukpanon nga kasinatian sa pagpadagan og nasyonal ug regional nga Telco operation, ang langyaw nga partner di na kinahanglan sa PT&T aron mokwalipika. Ang Terms of Reference naglatid nga regional ug national scale operation ang qualifying criteria apan giusab kini sa bid document nga nag-ingon na lang nga ang regional operation moaplay lamang sa mga operator nga langyaw. Ang maong kausaban sa gimando sa balaod esensyal kaayo ug dili kini pwedeng idismis nga simple lamang nga isyu. Bisag unsaon nimo og tan-aw, ang PT&T puno og kasinatian nga nasyonal ug regional ug ang ubang aspirante wala gyud.
Ang tumong unta nga human sa pagdaog sa bid, mangita dayon og langyaw nga partner. Makaayo ni sa nasud labi na sa isyu sa seguridad. Wa na magtakiang ang PT&T sa pinansyal nga problema. Sa tinuod lang, maskulado ang kahimtang sa iyang pinansya ilawom sa pagdumala sa bag-o nga tag-iya – ang grupo sa mga Zamora.
Ang babag sa PT&T mao ang kwestyon sa balaod samtang ang kalisdanan sa UDENNA mao ang kamatuoran. Mientras tanto, nagdagan ang oras. Hapit na moabot si Pres. Xi Jinping ug naglaum siya nga di lang moskitero ang iyang makit-an sa yano ug madaginoton nga katulganan ni Pres. Duterte kundili ang mga seremonyas sa pagpinermahay og mga dokumento sa mga dagkong proyekto apil na ang ikatulong Telco nga molangkob sa China Telecom nga kabahin sa consortium. Lahi na sab nga tema ang pangutana kun magmalampuson ba kining maong partnership tungod sa mga makatugaw sa hunahuna nga mga kaugmaran nga nagabukhad kada adlaw. (Jun Ledesma)
20
