MORA OG TAG-dyes sentimos na lang ang dosena sa ginapundar sa mga badlongon nga mga Coalition Against Corruption. Nagsulat ko niadtong Miyrkoles og tubag sa headline sa usa ka inadlawng mantalaan nga naghisgot sa panawagan sa CAC nga paluwaton si Finance Secretary Sonny Dominguez sa iyang posisyon tungod kuno sa kahilum niya bahin sa dakong bulto sa shabu nga ningsulod sa pantalan sa Cavite nga karon usa ka isyu nga ningtay-og sa Bureau of Customs.
Way gihinganlan kun kinsa ang nagpaluyo sa CAC mao nga akong gihiling sa Google. Dinhay mga pangalan sa mga institusyon nga gilista apan di kini supisyente isip kasaligang tinubdan gawas sa katapusan nga mao ang Makati Business Club nga kuno maoy convenor. Para sa usa ka news nga makatay-og sama sa panawagan sa pagpaluwat sa Kalihim sa Panalapi, ang magsusulat kinahanglan nga dunay kasaligang tinubdan. Mao nga ninglunsad ko og dugang lakang pagkab-ot sa detalye ug kamatuoran. Uho da man, si Coco Alcuaz, ang Executive Director sa Makati Business Club, ning e-mail nako nga di tinuod nga ang Coalition Against Corruption nga napatik didto sa news mao ang ilaha nga CAC. Gipahibalo ni Director Alcuaz ang Department of Finance nga ang panawagan sa pagparesign ni Dominguez wa maggikan sa MBC o sa ilang CAC ug “wa sila masayod kun kinsa ning maong Coalition Against Corruption”.
Akong mahinumdoman ang pareho nga pangilad diri sa Davao City kun diin usa ka gamay nga paksiyon kontra kuno sa kurapsyon nangimbento og mga istorya aron palagputon ang usa ka ligdong ug but-an nga kolektor sa Bureau of Customs sa pantalan sa Davao. Si Collector Anju Castigador ang pinakamaayo ug wa pa gyud hitupngi nga nangulo sa Davao Port nga ningmintinar og koleksyon nga wa moubos sa 120%.
Ang pobre tawon mora og gitam-okan og bukid nga ningdahili tungod sa iyang pagbalibad sa paghatag og clearance sa pipila ka 40-footer vans nga gisudlan og mga mis-declared nga kargamento sa bugas humay. Iya sab nga gipaserado ang usa ka temporaryo nga inspection area kun diin ang mga kontrabando makalusot gihapon bisan og naggamit na og mga makina sa x-ray. Ang nangulo sa kuno anti-corruption coalition usa ka paring Jesuita nga pipila ka buwan ang ninglabay human sa pagpalagpot sa Collector gikan sa pantalan sa Davao nakodakan nga nagduladula sa snow didto sa Oslo, Norway kauban ang usa ka personahe nga lider sab sa maong peke nga koalisyon nga maoy nagpasiugda sa pagpalagpot sa Collector.
Nagtuo ko primero nga ang mahulgaon ug yawan-on nga mga nagkomplot mahadlok sa mahait nga pinulongan ni Pres. Rodrigo Duterte. Sayop diay ko kay gasige pa man gihapon sila og puparada ug pasundayag isip Coalition Against Corruption. Niining higayona, nasayop sila og pili og target. Ang Makati Business Club nga dunay kaugalingon nga CAC ningdumili sa pagsuporta sa panawagan sa kadudaduda nga CAC. Way isyu ang MBC batok kang Secretary Dominguez ug ako mismo mapasalamaton kaayo kang Director Alcuaz sa tataw ug kusog nga pagpalanog niining maong kamatuoran. Dawata ang akong pagpangayog pasaylo sa sayop nakong pagtuo nga ang inyong CAC mao kining lain na sab diay nga grupong gipanamkon sa mga yawan-on ug gipanganak sa kangitngit ug nagkomplot na sab aron ipalabas nga dautan ug yawan-on ang gobyernong Duterte ug ang tuyo mao ang pagdeestabilisa niini.
Kaso na sab ni sa usa ka mini nga CAC nga morag yawan-ong madyikero nga nagapalutaw og peke ug pandaot nga mga isyu batok kang Finance Secretary Dominguez. Bisag unsaon ninyog maniobra ug pagkomplot, di mo mosalir. Di siya kinahanglan nga depensahan ni Duterte tungod kay ang iyang agi mao ang pinakaepektibo ug buhing saksi batok sa mga isyu nga gipasangil kaniya. (Jun Ledesma)
20
