OPINYON: Sen. Bong Go? Nganong dili?

SI BONG GO, ang special assistant sa Presidente ug karon kandidato pagka Senador, ningtugpa sa 5-6 nga pwesto sa pinakabag-o nga survey sa SWS ug Pulse Asia. Gilayon, morag giatngan, gipuntirya dayon siya sa mga way kukaluoy ug mapintas nga pagdaot nga ang bugtong nga tumong mao ang pagguba sa iyang komportableng posisyon sa survey ug ihulagway siya nga way pulos ug kutob ra sa pangpangguba sa letrato sa Presidente. Ang mapintas nga mga ataki gisabwag sa social media, maayong pagkasulat apan korto og panan-aw ug klaro kaayo nga adunay gipaboran tungod kay ang mga nanag-una nakaluklok na sa pwesto ug ang nasulod sa magic circle nga 12 ka kandidato mga politikal karakter nga kun sa hayop pa de-rasa ug gikan sa high class nga mga tulunghaan apan ang rekord sa serbisyo publiko lagmit namansahan og kurapsyon ug walay pagpakabana sa mga kabus.

Nailhan ko ning tawhana sa duol sama sa iyang boss. Maayo og agi ang kanhi SAP. Naangkon niya ang talagsaong kahigayonan nga gitudloan siya ug namanso sa usa ka lider sa politika nga sama kaniya naggikan sa pinakalayong tumoy sa nasud diin ang pagdaog sa usa ka pwestong nasyonal ginakonsiderar nga pantasya. Ang mga kritiko ni Bong Go nag-antos sa maling ideya nga ang taga Imperial Manila lamang o mga aktor sa pelikula ang pwedeng modaog ug bisan og ang idolo sa boksing nga si Manny Pacquiao ningdaog sa Senado nagtuo sila sa panultihon nga ang kilat dili makaigo sa usa ka lugar og kaduha. (Sa tinuod lang, mahitabo na pipila ka minutos human sa primerong igo o human sa pipila ka tuig nga molabay.)

Ang iyang pagtuon sa arte sa politika sulod sa 25 anyos pwedeng itandi sa mga katuigan sa pag-eskwela nga nagsugod og kinder ug ningtapos sa master’s degree. Ug pwerteng daghana sa iyang nakat-onan nga kun isulat og libro, daghan ug baga kini kaayo. Dili ba si Duterte ang ning-usab sa lingwahe sa diplomasiya sa iyang pagpakigsandurot sa mga lideres sa mga superpower ug sa arte sa pagdumala sa pakiglambigit sa mga langyaw? Dili ba ang iyang boss mao ang responsable sa paghimo sa Syudad sa Davao nga usa sa mga maanindot nga puy-an sa tibuok Asya, pinakamainamigohon sa patigayon sa tibuok nasud ug sa kabataan ug malahutayon sa iyang paglambo nga kasagaran 9% nga ninglabaw kanunay sa national average nga 6%?

Ang iyang mga kritiko nasina kaayo tungod sa iyang kasuod sa pinakapopular ug pinakasinaligan nga Presidente sa katawhang Pilipino. Giputol na niya ang iyang pusod nga politikal nga nagkonekta kaniya ngadto kang Presidente Duterte apan ako nakahibalo nga pwede siyang tawgon bisag unsang orasa sa Presidente. Sa pagkakaron kasagaran si Bong solo nga nagapursige sa iyang kandidatura. Nagapupo siya sa mga bunga nga naggikan sa iyang pagpakig-uban sa Presidente kapin sa duha ka dekada ug aduna siyay mga higala ug mga dumadapig sa tanang suok sa nasud. Dako sab kaayo og ikatabang ang iyang pagdumala sa social outreach program sa Presidente kaniadto. Wala siya malambigit sa mga adunahan ug mga bantugan apan ako ni siyang nakit-an nga gihalog sa mga tawong iyang natabangan. Mga biktima sa sunog ug baha, mga masakiton, mga nanginahanglan ug gigutom. Siya ang nagapadagan sa “Lingap” program sa Syudad sa Davao nga maoy modelo  sa “Malasakit Centers” nga iya karong  ginaestablisar sa nagkalainlaing parte sa nasud.

Si Bong Go nasayud kun asa maggikan ang iyang pwersa – gikan sa kinabag-ang duot sa masang Pilipino nga nag-antos sa kawad-on ug kalisud. Wala siya mosaad og dinagko. Si Bong Go Senador? Pipila ka kritiko nangutana nga nangyam-id kay nakalimot o wa kahibalo nga ang presidential assistant nakapakita na og abilidad ug solido nga agi. Lagmit ang iyang nahimo para sa iyang kaugalingon ug iyang boss wala kaayo niya tagai og bili ug kahulogan apan kadtong ningtubag og positibo sa mga survey lanog kaayo nga nagpasibaw sa ilang pagpili kang Bong. Oo. Sa sulod niining bantugang photo-bomber ug banggiitang basketbolista ang usa ka sulogoon sa publiko nga nakalibot na sa tibuok nasud sa mas daghan nga higayon kay sa kanhi, kasamtangan ug, sa ilang postura, umaabot nga mga senador.

Nakaadto na siya sa mga lugar nga ang kasamtangang mga magbabalaod mahadlok motaak – mga slum, kampo sa mga rebelde ug luklukanan sa New People’s Army. Insakto ang iyang kasayuran bahin sa ma balaod nga ipursige ug sa akong panagna: pag-atiman sa panglawas ug mga benepisyo, kaayohan sa mga OFW, irigasyon para sa mga mag-uuma, yuta ug puluy-anan para sa mga rebel returnee, kaseguroan sa pagkaon, ug dugang pang mga benepisyo sa mga senior citizen nga sama nako. Dili engrande ug ang tanan kaya nga mahimo ug tungod kay ang tumong niini mao man ang pagtubag sa panginahanglan sa mga kabus ug sa hatungang hut-ong nga nanginahanglan, segurado ka nga kining kandidatoha modeliver, segun sa garantiya ni Presidente Duterte. Sa panultihon pa, “ang bisyo lang ni Bong Go mao ang pagserbisyo”. Dili nimo kaya nga ihagbong kining buotan ug yano nga tawo. Senador Bong Go? Nganong dili? (Jun Ledesma)