GIDAWAT ni Presidente Benigno Aquino ang mga dibidendo ug remittances sa mga Government-Owned and Controlled Corporation (GOCCs) ug mga Government Financial Institutions (GFIs).
Sigun pa sa datos sa Governance Commission for GOCCs, P36.36 bilyon ang kinatibuk-ang kantidad nga gihatag sa 49 ka GOCCs ngadto sa nasudnong kagamhanan. Gihimo ang ceremonial turnover sa Rizal Ceremonial Hall sa Malakanyang nga gitambongan sa mga pangulo ug tinugyanan sa 49 ka GOCCs.
Ang pinakadakung dibidendo nagikan sa Land Bank of the Philippines nga nagkantidad og kapin sa P6.2 bilyon samtang ang pinakadakung remittance usab naggikan sa Philippine Amusement and Gaming Corporation nga nagkantidad og kapin sa P10.1 bilyon.
Karong tuig, 10 ka GOCCs ang na-apil sa gitawag nga billionaire’s club diin milapas sa P1 bilyon ang gihatag sa gobyerno.
Base sa Republic Act No. 7656, kinahanglang ihatag sa mga GOCCs sa nasudnong kagamhanan ang dili mo-ubos sa 50% sa ilang tinuig nga kita.
Tuig 2010 dihang nagsugod ang pag-ila sa Department of Finance sa mga kita sa grupo nga gina-remit sa nasudnong kagamhanan agig pagsunod sa RA 7656.
Sukad sa tuig 2010, mikabat na sa P29 bilyon ang na-remit sa GOCC sa gobyerno samtang kapin sa P32 bilyon ang naremit sa niaging tuig. (Elvira C. Bongosia)
20
