Ang secretariat sa Mount Hamiguitan World Heritage Development and Management Council. (Sarx Lanos)
MATI CITY – Gilihok sa kagamhanan sa Probinsya sa Davao Oriental ilawom sa pamunoan ni Gobernador Corazon Malanyaon ang hugot nga pag-amoma sa Mount Hamiguitan World Heritage Site isip bililhong dapit sa kinaiyahan aron magpabilin nga luwas nga puloy-anan sa nahibiling mga talagsaong kahayopan ug talagsaong mga tanom.
Atol sa unang tigum sa Mount Hamiguitan World Heritage Development and Management Council (MHWHDMC), Pebrero 4, 2015 nga gipahigayon sa La-nes Function Room, dinhi nga ciudad, pinangulohan mismo ni Malanyaon, gi-plastar ang organizational chart nga gilangkoban sa nagkalain-laing komitiba.
Ang mao nga tigum gitambongan sa mga sakop sa MHWHDMC nga naglangkob sa mga representante sa Department of Environment and Natural Resources, Philippine National Police, Philippine Army, Coast Guard, Department of Public Works and Highways, nongovernmental organizations, Lumads, Department of the Interior and Local Government, akademya, ug gikan sa mga departamento sa probinsya nga mga buhatan.
Matud pa ni Malanyaon nga ang secretariat sa MHWHDMC nga gipangulohan ni Environmental Planner Dolores Valdesco mao usab ang maglantaw ug hugot nga magko-ordina sa matag komitiba nga naglangkob sa mga sakop gikan sa nagkalainlaing ahensya sa nasudnon ug lokal sa kagamhanan lakip na sa mga kahugpongan sa katawhan ilabina ang mga lumad.
Ang Bukid Hamiguitan nga nahimutang taliwala sa mga lungsod sa Governor Generoso ug San Isidro ug sa ciudad sa Mati diin adunay gilapdon nga 26,667.54 ektaryas nga adunay buffer zone nga 9,729 ektaryas ug sa gihabogon nga 1,637 metros ibabaw sa dagat, gideklara kini sa United Nations Educational, Scientific and Cultural Organization niadtong Hunyo 23, 2014 didto sa Qatar isip World Heritage Site, gumikan sa daghang mga mahinungdanong rason.
Giingon ni Valdesco nga ang Bukid Hamiguitan mao ang bugtong World Heritage Site sa tibuok Mindanaw ug ika-unom nga World Heritage Site sa tibuok Pilipinas. Ang mao nga bukid mao ang gitubo-an ug gi-puy-an sa nahibilin sa nagka-hanaw nga mga bililhong tanom ug mga hayop nga naihap ngadto sa 1,380 ka klase ug ang 341 ka klase niini nga didto lamang makita sa mao nga bukid sama sa Philippine Cockatoo, Agila, talagsaong klase sa kahoy ug ubang mga tanom.
Giingon sa Gobernador nga hangtod sa pagka-karon hugot gayud nga gidili ang pagsulod sa Bukid Hamiguitan lakip na ang mga turista, researchers ug labaw sa tanan ngadto sa mga tigu-guba sa kinaiayahan. (Sarx Lanos)
20