MAS hingosgan pa sa gobyerno ang pagmugna og dugang trabaho ug ang pagpakunhod sa inflation rate sa nasud sa nahabiling termino sa administrasyon ni Presidente Benigno Aquino.
Kini ang giseguro ni Presidential Communications Operations Officer Sonny Coloma, Jr. human migawas ang resulta sa Pulse Asia survey nga nag-ingon`g mayorya sa mga Pilipino ang dismayado sa pagtubag sa gobyerno sa mga problema sa nasud.
“In the next 15 months, the administration will intensify efforts at job creation while maintaining fiscal discipline in order to rein in inflation. Good governance is imperative in achieving inclusive growth,” matud pa ni Coloma.
Matud pa sa Kalihim nga adunay tukmang mekanismo ang gobyerno aron pagsiguro sa pagmugna og dugang trabaho taliwala pa gihapon sa pagpatuman og disiplina ug madaginutong paggamit sa pondo sa katawhan.
Gipasabot pa ni Coloma nga ang maayong pagdumala pa gihapon ang mahinungdanong giya sa pagkab-ot sa inclusive growth.
Giingon`g doblehon pa sa gobyerno ang pagpaningkamot sa nahabiling panahon sa termino sa administrasyong Aquino aron matubag ang panginahanglan ug interes sa katawhan.
Mao kini ang pasalig sa Palasyo kalabot gihapon sa nahisgotang survey diin ang paghimo og aksiyon batok sa inflation rate, hangyo nga dugang suholan ug pagbatok sa korapsiyon ang tulo ka nag-unang concern o gikabalak-an sa publiko.
Base sa maong survey, mikabat sa 46% ang angay nga paghimo og aksiyon batok sa inflation, 44% alang sa umento sa suholan ug 40% gikan sa kanhi 36% alang sa pagbatok sa korapsiyon. (ECB)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/ and http://www.mindanaoexaminer.net/
Share The News
20
