MATI CITY (Mindanao Examiner / May 15, 2014) – Tunga sa adlaw nga gipresentar sa tigdumala sa Davao Oriental Electric Cooperative o Doreco ngadto sa mga tigbalita ang kinatibuk-ang dagway sa mao nga buhatan lakip na ang hinungdan sa sagunson nga pagpalong ug ang pagtaas sa presyo sa kuryente.
Atol sa press conference nga gipasiugdahan sa Doreco, Mayo 14 sa hapon sulod sa isa ka Kan-anan dinhi nga Ciudad, si Doreco BoD President Chito Gregorio ug General Manager Engr. Greg Dukil nangulo sa pagpasabot ngadto sa Media nga daghan ang hinungdan nga nasinati karon ilabina dinhi sa Mindanao kon ngano nga pirmi adunay pagkapalong sa kuryente.
Gipasabot sa Doreco nga gumikan kay gipatas-an man sa supplier sa kuryente ang presyo mao nga gipatas-an usab ang sukot ngadto sa mga konsumante ug ang mga supplier nagmando usab sa Doreco nga gumikan sa pagnihit sa supply sa kuryente mao nga kinahanglang mag eskedyul og pagpalong sa kuryente puli-puli sa managlahing lugar kay kon dili motuman sa mao nga mando ang Doreco mahimong dili na palatayan og kuryente ang Davao Oriental ug mapalongan na ang tibuok probinsya.
Gibasol sa Doreco ang pagbag-o sa klima ug kainit sa panahon isip nag-unang hinungdan sa sagunson nga brownouts gumikan sa pagkunhod sa agas sa tubig gikan sa tinubdan sa mga suba ngadto sa mga dam ug linaw nga gigamit sa pagmugna og kuryente.
Gihisgotan usab atol sa mao nga tigum nga daghan ang mga balaod nga gipakanaog karon ang kagamhanan lakip na niini ang paghatag katungod sa bisan kinsang interesado nga buot mamaligya sa pag supply og kuryente.
Dugang gipasabot ni Dukil nga lainlaing supplier sa kuryente ang ginakuhaan sa Doreco. Iyang giingon nga ang Doreco mag-ugmad na unta og isa ka busay dinhi sa Davor aron magamit pagmugna og kuryente apan dili na diay makahutay pagbuwelo sa pag-agas og tubig ang mao nga dapit kay didto sa ulohan sa busay gipamutol na ang kahoy.
Isa sa hinungdan sa pagpahigayon sa mao nga presscon mao ang sagunson nga pag-ataki nga gihimo sa Media ngadto sa Doreco. Kabahin niini ang kakulang sa pagpahibalo ngadto sa katawhan sa mga eskedyul sa pagpalong sa kuryente lakip ang daghang gipanglista sa billings nga mga bayronon, dali nga pagpamutol apan dugay nga pagsumpay-balik sa kuryente bisan pa man nakabayad na, bisan sige brownouts apan daku gihapon ang bayronon, ug daghan pang mga mulo, apan ang tanan napasabot ra gihapon sa Doreco. (Sarx Lanos)
20