Sulat Gikan sa Davao: ‘Pagsalbar sa atong mga OFWs’ ni Jun Ledesma
ANG RELASYON sa diplomasiya tali sa Kuwait ug Pilipinas nag-atubang karon sa dakong pagsulay. Human kini sa nahitabong pagsalbar sa mga empleyado sa Embahada sa usa ka katabang nga wala makigkoordinar sa lokal nga awtoridad, ningvideo ug ningbrodkast sa maong operasyon sa rason nga maingon natong hilabihan nga pagkakatok.
Tungod kay wa may moangkon, si Presidente Rodrigo Duterte na mismo ang ning-ako sa responsibilidad. Tungod sa grabeng kabalaka nga basin og lain na sab nga kinabuhi sa OFW ang mameligro, nangaliyupo siya sa mga Overseas Filipino Workers sa Kuwait nga unta mamauli na.
Ang mga kritiko ni Duterte, nga morag mga irong buang nga nagtulo-tulo ang laway samtang naghulat og mga isyu nga magamit nila pag-ataki sa tuyo nga tibhangan ang pagsalig ug popularidad sa Presidente, ningkalit og dasdas gikan sa mangiob nilang mga tagoanan ug nag-ilog sa paghambat ug pagkuniskunis sa maong isyu.
Temporaryong tambal ni sa ilang tumang kahidlaw ug kaungo. Nasayud ta nga ang Kuwait adunay mga OFWs nga mokabat og di mominos sa 250,000. Sukwahi sa pagtuo sa kadaghanan nga ang pinakadaghan sa OFWs sa Kuwait mga domestic helpers, daghan kanila ang nagatrabaho sa mga industriya sa lana ug construction, sa mga ospital ug mga klinika ug ubang serbisyo nga teknikal. Gusto nato nga magtuo nga ang pagpanarbaho sa mga Filipinos dili lang tungod sa kakugi ug abilidad sa mga OFWs kundili labaw pa gyud niini.
Sa usa ka yugto sa kasaysayan kun diin nagbitay na lang sa usa ka lugas lanot ang pagtunhay sa nasud nga Kuwait, ang Pilipinas nagpadala og armadong yunit aron motabang kanila sa pakiggubat sa nanulong nga pwersa sa Iraq ug pagtabang sa tanang nasud sa Gulpo, apil na ang Kuwait, sa pagpabalik sa kalinaw ug kalig-on sa mga estado.
Kini, alang kanako, mao ang bugkos nga maoy naglig-on sa relasyon sa duha ka lagyong nasud. Dinhay mga madalidalion nga aksyon ug mga gilubatlubatan nga mga reaksyon apan kun ang emosyon mokalma na, seryosong pakig-istorya ug rasyonal nga mga desisyon ang kinahanglan nga himoon. Ang matugbangon nga mga sakripisyo ug mga pabor nakakulit na sa kasaysayan sa duha ka nasud.
Kun si Presidente Duterte ning-apila sa mga OFWs nga ilang tagaan og konsiderasyon ang pag-uli, gusto ko nga motuo nga tungod kini sa nagsingabot nga kakulang sa hanas nga mga trabhante ug mga inhenyero nga motrabaho sa mga mega-proyekto sa mga imprastruktura nga hapit na iimplementar ilawom sa Build Build Build program sa administrasyong Duterte. Ang Pilipinas nahimutang sa parte sa Asya kun asa ang politika sa Asya ug sa tibuok kalibutan kusog nga nagbukalbukal.
Nalutas na kini ug iya na nga inanay nga giputol ang iyang pusod gikan kang nanay America ug ningbarog na kining tuyhad ug tupong ang abaga sa ubang nasud sa China, Russia, Japan, ug nagpabilin nga lig-on ug porsigido nga sakop sa ASEAN. Ang dramatikanhong pag-usbaw sa China ug ang malahutayong ekonomiya sa Japan plus ang bag-ong panaghigalaay sa Russia nagaabli og mas hayag nga palaaboton sa mga OFWs. Naay mga rason nganong dapat lang nga paulion nato ang atong mga OFWs hilabi na ang mga domestic helpers.
Pila ka tuig kanhi, si Presidente Gloria Arroyo gustong mopapauli sa mga domestic helper sa tuyo nga itreyning sila og usab sa TESDA aron mapataas pa ang ilang abilidad ug mga kwalipikasyon. Kini tungod kay ang atong mga domestic helpers o DH maayo mo-Iningles ug ang mga anak sa ilang mga amo ginatudloan nila dili lang sa pag-Iningles kundili apil sab ang Arithmetic. Ang maong plano ni Arroyo gisupak sa mga grupo sa mamumuo ug mga NGOs sa mabaw nga rason nga mailisan ang mga DH.
Engrandeng pagka-estupido kadto kun ako ang inyong pangutan-on. Hinoon, niining panahona, ang administrasyong Duterte pwedeng mopursige na sa maong programa. Imbes mopadala og domestic helpers, ilawom sa pagtudlo ug paggiya sa TESDA, pwede na silang makakuha og mga trabaho sa China, Singapore, Korea, ug Japan isip mga Domestic Tutor. Moresulta ni sa pagtaas sa ilang status ngadto sa level nga propesyonal ug pagtaas usab sa ilang kita. Tungod sa kataas na sa kredensyal, segurado ko nga dili na sila itratar mga morag mga ulipon ug dili na mosangko nga hayaon sa freezer. (Jun Ledesma)
20
