CEBU – Gioktaba una ang pagpanakop sa mga tabon sa plaka, lakip na ang pag-pang-usab sa kaha sa mga sakyanan, patin-aw sa Land Transportation Office.
Apan bisan pa, kadtong nagtaud og salipod sa plaka nga nagpugong aron dili na maklaro ang mga numero ug letra niini, dakponon gihapon.
Kini human nagubot ang industriya sa panakyanan dihang napabalita ang pahayag ni LTO Spokesperson Jason Salvador nagdto sa mga media outlets kabahin sa bisan unsa nga matang sa plate accessories sama sa tabon, mga bracket ug uban pang makasalipud aron dili na maklaro pa ang numero ug letra sa plaka.
Kini usab, matud pa, subay sa LTO ug DOTC Joint Administrative Order 2014-01.
Apan sa pagpakighinabi sa mga sakop sa media ngadto kang LTO Assistant Secretary Atty. Alfonso V. Tan, Jr., gibutyag sa naulahi nga ang pagpanakop sa plate covers, frames ug pag-usab sa kaha sa sakyanan undangon una, samtang gihipno pa ang implementing rules.
Samtang mahimo pang magamit ang mga tabon sa plaka, gipasabot sa LTO nga hangtud ang tabon sa plaka dili makapahanap sa plaka, dili kini angayan dakpon.
Gipatataw usab sa opisyal sa LTO nga hangtud wala pa mahipno ang implementing rules and regulations kabahin niini, bisan ang mga nagpa-usab sa kaha sa ilang mga sakyanan, dili una dakpon.
Base sa mga probisyones sa JAO 2014-01, ang pagbutang og mga accessories sa bisan unsang matang sa plaka, kamultahan og P5,000, samtang embargohon pa ang accessory. (Rey Anthony Chiu)
20