DAPITAN CITY – Isang parak ang itinumba ng dalawang armado na sakay ng motorsiklo sa Dapitan City sa Zamboanga del Norte province.
Kinumpirma ito kahapon ni Insp. Dahlan Samuddin, ang regional police spokesman, at sinabing patuloy ang imbestigasyon sa kaso. Kinilala rin nito ang biktima na si PO3 Ardie Galleposo, 43, at naka-destino sa bayan ng Mutia, ngunit residente ng Dapitan.
Naganap ang pamamaril sa parak kamakalawa ng hapon habang bumibili sa tindahan si Galleposo sa Barangay Polo.
Nakasuot lamang ng asul na bull cap ang mga salarin na pawing armado pa ng nikiladong .45-kalibre pistol, ayon sa mga nakasaksi sa pamamaslang sa parak.
Malapitan umano ng tinira ng mga salarin si Galleposo at mabilis na tumakas sakay ng Honda XRM. Nabawi sa lugar ang 3 basyo ng bala, sabi ni Samuddin.
Hindi pa mabatid kung may kinalaman ang rebeldeng New People’s Army sa atake o sindikato. (Mindanao Examiner)
20