ZAMBOANGA CITY (Mindanao Examiner / June 3, 2013) – Isang parak ang nadagdag sa mahabang listahan ng mga biktima ng pamamaslang sa magulong lungsod ng Zamboanga.
Sinabi ng pulisya na pinatay ng di-kilalang salarin si SPO1 Rowan Lim sa Barangay Tumaga nitong kamakalawa lamang. Dalawang basyo ng bala mula sa .45-kalibre ang nabawi sa lugar.
Hindi pa mabatid ang motibo sa pagpatay sa parak na naka-destino sa himpilan ng pulisya sa Barangay Sangali.
Nabatid pa sa pulisya na naisugod pa sa pagamutan si Lim, ngunit doon na ito nasawi.
Talamak ang patayan sa Zamboanga City at madalas lamang na sisihin ng pulisya ang personal grudge sa mga krimen. Aktibo ang mga hired killers sa Zamboanga, ngunit bigo naman ang mga awtoridad na sila’y matunton at madakip.
Madalas pang sisihin ng mga opisyal ang media sa umano’y mga balitang may kinalaman sa walang humpay na krimen. (Mindanao Examiner)
20