CEBU CITY – Sa tuyo nga ma monitor ang mga mosulod-gawas nga mga pasahero ug mga kargamento sa Pasil Fish Port, laraw sa kagamhanan sa dakbayan sa Sugbo nga magbutang og usa monitoring system arun mapakgang ang pagsulod sa mga illegal sa maong pantalan.
Gibutyag ni Atty. Collin Rosell, pangulo sa Coastline Management Board, nga gisuta karun sa dakbayan uban sa Bantay Dagat ang dagan sa operasyon sa maong pantalan human sa nahitabong pagkasikop sa usa ka motor Bangka sa miaging semana nga may makumpiskar nga armas ug mga marijuana nga gituohang nagdunggo gikan sa Pasil port.
Matud ni Rosell nga buot niining ma establisar ug ma secure ang area sa pasilidad ingun man ma regulate ang mosulod-gawas sa maong pantalan hilabi na sa nahitabong pagkadakop sa maong Bangka.
Buot usab niining masayran kinsa ang nagdumala sa maong pantalan, asa ang kita sa koleksyon niini kun aduna man ug gikinahanglan bang magpadagan ang dakbayan ug usa ka passenger terminal sa dapit.
“We just wanted to secure and establish the parameters of the area and to regulate its operation… we also wanted to know what vessels allowed to dock and if there is proper monitoring,” Matud ni Rosell.
Gitambungan ang maong tigom sa Philippine Coastguard, Maritime Police ug sa Naval Forces Central ug sa representante sa Bantay Dagat ug sa Cebu City Environment Office diin nagkauyon kining mopahigayon og ocular inspection sa pantalan karung katapusang semana sa buwan. (Elite)
20