DAVAO ORIENTAL (Mindanao Examiner / Feb. 6, 2013)- Ang Kilusang Magbubukid ng Pilipinas nanawagan sa tanang biktima sa Bagyong Pablo (Bopha) nga dili magpa-ilad sa gihangyag nga pautang sa Department of Agriculture – mao kini ang giluwat nga pahayag ni Pedro Arnado, Secretary General sa KMP-SMR, pinakalapad nga alyansa mga mga mag-uuma sa rehiyon.
“Wala pa gani nakabangon ang mga biktima sa hapak ni Bagyong Pablo, daw bagyo na usab kining muhapak sa ilang kinabuhi bunga sa maong pautang.”
Didto sa Provincial Capitol sa Tagum City, bag-ohay lang, gipadayag sa Department of Agriculture pinaagi ni Bernadette San Juan sa gipahitabong tigum sa DA-ACPC (Dept Agriculture- Agricultural Credit Policy Council) Special Agriculture Financing Facility for Farmes and Fishers nga pwede ng mangutang ang tanang biktima sa Bagyong Pablo.
Ang DA-ACPC, pinaagi sa ilang partner financing institutions ang Cooperative Bank sa Misamis Oriental ug sa Cooperative Bank sa Agusan del sur mihanyag og loans nga muabot og 150,000 pesos alang sa mga mag-uuma, mangingisda sa mga lugar diin biktima sa Bagyong Pablo.
Ang maong pagpautang adunay interest rate nga 8% ug 4% service fee ug bayran kini matag bulan, kada-3 ka bulan, panahon sa ting-ani or lump sum nga dili mulampas sa usa ka tuig.
“Ang maong programa, walay kalainan sa iskemang growership o kadtong pag-convert sa lapad nga mag umahan aron mahimong plantasyon sa saging. Sama sa growership, kinahanglan nilang mangutang sa Landbank aron idevelop ang ilang kayutaan. Apan sa maong eskema, nalubong na hinuon sa utang ang mga growers ug wala na kini kakayahang makabayad sa minilyong utang, mamahimo ng i-collateral ang ilang mga kayutaan ug maangkon sa mga korporasyon,” dugang pa ni Arnado.
“Ug dahuman ta nga sa programang pautang sa DA, mamahimong icollateral usab ang kayutaan sa mga maguuma ug kung dili kini mabayran, dili imposible nga maimbargo ang yuta nga ilang gipanagiyahan. Usa kini sa pinakadakong hinungdan sa kalisud ug kawad-on nga nasinati sa mga mag-uuma.”
Subay sa KMP, dili pautang ang maka – alibyo sa gipanglukdong suliran sa mga mag-uuma. Kung gustohon man sa panggamhanan nga tabangan ang mga mag-uuma, pananglitan sa mga mag-uuma sa lubi sa Davao Oriental, ang P56.5-bilyon nga pundo gikan sa coco levy angay ng ihatag sa mga mag-uuma sa lubi.
Ang gipanghambog sa panggamhanan nga mikolekta kuno sila og 1 trillion tax collection miaging tuig, nganong dili kini gamiton alang sa mga Biktima? Nganong pautang man ang ilang gidus-an?
Sa pangkinatibuk-an, angay na usab ipatuman na sa panggamhanan ang tinuod nga repormang agraryo, tungod kay mao lang kini ang tinuod nga solusyon sa dugay ng gilukdong suliran sa mga mag-uuma.”
“Ang pagkuntsabuhay sa Gubyernong Aquino ug sa mga bangkong tigpautang, makita ang baruganan ug ang tinuod nga hulagway nga ang Republika ni Noynoy Aquino republika sa mga dagkong agalong yutaan, kapitalista ug dili alang sa mga mag-uuma.”
20