CEBU – Gihagit ni Presidente Aquino III ang tanang lider sa lokal nga kagamhanan nga himuong permanente ang maayong bunga sa reporma tungod sa tul-id nga sistema sa pagdumala sa nasud.
Matud pa ni Aquino, dungan sa pagpalapad sa mga institusyon sa gobyerno, ang mga lokal liders ang pultahan sa nasudnong liderato aron ipahatud ang gikinahanglang tabang sa katawhan.
Mao kini ang hagit sa Presidente atubangan sa kapin sa usa ka libong mayor ug uban pang lokal nga lider sa gipahigayong League of Municipalities of the Philippines.
Gitumbok ni Aquino nga tungod sa maayong pagdumala, midaku og halos doble ang internal revenue allotment o IRA sa LGUs tungod sa epektibong koleksiyon sa buhis sulod sa lima ka tuig.
Tungod niini, gi-aghat sa Presidente ang LGUs nga ipatuman ang panaghiusa sa pagkab-ot sa kauswagan nga naka-base sa integridad ug kumpiyansa. Giingong dili angay masayang ang gitarong nga sistema alang sa nasudnong kaayohan.
Pagsiguro pa ni Aquino, wala naka-base sa politika ang pagpatuman sa mga mahinungdanong programa sa gobyerno. Gitumbok usab niya ang mga tulay ug imprastraktura nga natapos lamang ubos sa iyang pagdumala human sa duha hangtud tulo ka dekada. Apil na niini ang proyekto sa Iloilo, Alluling ug Lullutan Bridge sa Ilocos ug Isabela Provinces.
Giseguro usab ni Aquino ang tabang sa LGUs taliwala sa pagsulbad sa mga nasudnong problema apil na ang kalabot sa benepisyo sa mga unipormado.
Nagdala sa tema nga “Empowerment of LGUs towards all inclusive growth,” gipadangat usab sa pangulo sa LMP nga si Javier (Leyte) Mayor Leonardo Sandy Javier ang padayong suporta sa gidusong mga programa sa administrasyong Aquino. (Elvira C. Bongosia)
Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: http://www.mindanaoexaminer.com/ and http://www.mindanaoexaminer.net/
Share The News
20
