CEBU (Cebu Examiner / May 29, 2014) – Ika-unom ang Pilipinas sa pinaka-malipayong nasud sa tibuok kalibotan sa tuig 2013 sa Positive Experience Index survey nga gihimo sa US research group nga Gallup.
Sa 1,000 respondents gikan sa 138 ka nasud, migawas nga 7 sa 10 katawo sa kalibotan ang nakasinati og positibong emosyon sa dihang gipangutana kalabot sa nahimong adlaw nila ug 80% gikan sa Pilipinas ang mitubag og positibo o malipayon sila sa maong adlaw. Ka lebel sa Pilipinas sa ika-6 nga pwesto ang Indonesia ug Thailand.
Sa ikatulong higayon, nanguna pa gihapon ang Paraguay diin 87% sa respondents ang miingong positibo sila sa adlaw nga gihimo ang maong survey.
Nisunod sa listahan ang Panama nga adunay 86% samtang ikatulo ang Guatemala, Nicaragua ug Ecuador nga adunay 83%.
Naa sa ika-upat nga pwesto usab ang Costa Rica, Colombia ug Denmark diin natala ang 82% sa mga mi-responde ang malipayon ug ika-lima ang Honduras, Venezuela ug El Salvador nga adunay 81%.
Nag-una pa ang Pilipinas sa Canada ug Australia sa 79% ug Estados Unidos sa 78% nga pinaka-malipayong nasud. Samtang natala usab ang pinaka-ubos nga Positive Experience Index sa Syria nga may 36% lamang.
Ikaduhang tuig na kini sa Syria nga naa sa pinaka-ubos nga may positibong emosyon sa kalibotan. (MBCN, ECB)
20