CEBU – Nipasidaan ang Philippine Overseas Employment Administration sa tanang mga Overseas Filipino Workers nga mag-amping sa paggamit sa social media sama sa Facebook ug Twitter.
Matud pa ni POEA Administrator Hans Leo Cacdac, bisan maayo nga paagi ang social media aron mahimong maduol pa gihapon sa mga mahal sa kinabuhi bisan naa sa ubang nasud, giingong mahimo pa gihapon kining hinungdan sa problema.
Giingong angay sundon ang mga sumbanan aron malikay sa kagubot.
Una, angay nga limitahan ang mga post alang sa mga higala ug siguradohong mga close friends lamang ang naa sa friends list.
Matud pa nga dili angay i-add ang boss o agalon ug i-lain gayud ang personal account sa trabaho.
Dili angay gamiton ang social media aron ipagawas ang mga reklamo sa kumpanya imbes nga ipaagi kini sa grievance committee sa gi-trabahuan.
Giingong dili usab angay sawayon ang lahing kultura, relihiyon ug pamatasan sa mga tawo sa nasud nga gi-trabahuan ug dili usab moapil sa mga debate kalabot sa politika ug relihiyon.
Ug labi sa tanan, dili angay mag-post og mga malaw-ay nga hulagway. (MBCN, ECB)
20