ZAMBOANGA SIBUGAY (Mindanao Examiner / Dec. 17, 2013) – Isang provincial bus ang hinoldap ng 5 mga armado na nagpanggap na pasahero at nalimas umano ang mahigit sa P50,000 mula sa kanilang mga biktima bago tumakas sa highway sa bayan ng Ipil sa Zamboanga Sibugay.
Nabatid na isang pasahero rin ang isinugod sa pagamutan matapos itong bigwasan ng baril ng isa sa mga holdaper matapos na umabno’y tumangging ibigay ang kanyang salapi.
Kinumpirma ng pulisya ang naturang insidente at sinabing pinaghahanap na umano ang mga salarin.
Galing ang bus – na pagaari ng Rural Transit of Mindanao – sa Pagadian City at patungong Zamboanga City ng maganap ang panghoholdap. Sumakay ang mga armado sa bayan ng Kabasalan na katabi lamang ng Ipil. At habang tumatakbo ang bus ay nagdeklara ng holdap ang 5 lalaki na nasa ibat-ibang bahagi ng sasakyan at agad na nalimas ang mga salapi, cell phone, alahas at iba pang mga bagay mula sa kabilang biktima.
Hindi pa mabatid kung may nakilala sa mga salarin. Walang security camera o secret marshal ang naturang bus. Talamak ang holdapan sa kahabaan ng Zamboanga highway. (Mindanao Examiner)
20