DIPOLOG CITY (Mindanao Examiner / May 16, 2013) – Gipasalamatan karon ni Dipolog police chief Joven Parcon ang tibuok puwersa sa kapolisan, ang militar ug ang publiko nga mitabang sa pagbantay sa kahapsay ug kalinaw ning dakbayan sa Dipolog tungod kay nahimong malampuson ang eleksiyon gumikan sa ilang walay pu-as nga pagbantay sa seguridad dinhi.
Malipayon ang maong buhatan tungod kay nahuman gayud ang eleksiyon nga walay dagkung matang sa kriminalidad nga nagpanghitabo atol sa adlaw sa piniliay, diin gilaoman sa Dipolog police nga adunay walhong puwersang gustong mogubot sa mga “polling precincts”.
Dugang pang nasayran nga gipatuman nila ang lagda nga gisitar sa Commission on Elections, diin gimanduan ug gitahasan ang tibuok puwersa sa kapulisan ug Armed Forces of the Philippines nga siguraduhon gayud nga “ma-secure” ang ilang mga lugar nga ginsakupan aron dili gayud makasulod ang gustong mogubot dinhi.
Kini pinaagi sa pagpatuman sa “Gun Ban”, “Money Ban”, “Liquor Ban”, “No Vote-Buying/Selling,” sa pagsigurado nga ang mga “elected public officials” anaa lamang sa “30-50 meters range” gikan sa mga “polling precincts” gawas lang kung mobotar kini, ug sa pagsigurado nga dili na maka-operate ang mga tigpahigayon ug nagkalain-laing kriminalidad sulod sa siyudad sama na lamang sa robbery, hold-up, ransack, theft, patay ug daghanan pang uban.
Nunot niining maong kalambuan, gipasalig sa kuwerpo sa kapolisan nga buhaton nila ang kutob sa ilang makaya aron gayud mamintinar ang kahapsay ug kalinaw sa siyudad sa tanang panahon bisan paman sa kakulangon sa ilang mga armed personnel.
Gipasalamatan usab sa maong buhatan ang dakung tabang nga natampo sa PNP Provincial Command pinaagi sa pagtahas sa mobile group niini, ang Provincial Public Safety Company nga maoy mo-asister sa Dipolog police aron mapahigayon ang hiniusang pagpatuman sa seguridad sulod sa siyudad isip usa sa kamandoan sa COMELEC aron gayud malikayan ang pag-ulbo sa kagubot dinhi.
20