KIDAPAWAN CITY — Patay ang isang punong barangay ng pagbabarilin ng ‘di pa nakilalang suspek na nakamotorsiklo sa panibagong krimen na naganap sa Purok Pagkakaisa, Barangay Pisan sa bayan ng Kabacan, North Cotabato, umaga ngayong Lunes.
Kinilala ang nasawi na si Nestor Ranay, 37-anyos, may asawa at punong barangay ng nasabing lugar.
Sa ulat na nakarating sa Kabacan PNP, pauwi na ang biktima galing ng Barangay Hall matapos na dumalo sa Monday flag raising ceremony alas-9:10 ng umaga.
Pagdating ng biktima sa nasabing lugar lulan ng kanyang Honda Click Scooter ay pinagbabaril ng di pa nakilalang gunman.
Nagtamo ang biktima ng tama ng bala sa kanyang kaliwang balikat at tiyan na mabilis namang isinugod sa Polymedic Hospital sa Barangay Osias, Kabacan.
Dinala pa ang kapitan sa isang ospital dito sa Kidapawan pero tuluyan ding binawian ng buhay habang ginagamot.
Isa ang pulitika sa mga sinisilip na anggulo bagaman at hindi rin nila isinasantabi ang personal grude sa motibo sa krimen habang nagpapatuloy ang malalimang imbestigasiyon.
Inatasan na ni Mayor Herlo Guzman Jr., ang pulisya na tugisan ang mga suspek na responsable sa krimen. (Rhoderick Beñez)
0
20
20
