DIPOLOG CITY (Mindanao Examiner / Nov. 12, 2012) – Mokabat ngadto sa P13.5 milyones ka pesos ang gi-alokar nga pondo alang sa proyektong Farm to Market Road didto sa barangay Miputak ngadto sa Barangay Santa Isabel ning dakbayan sa Dipolog nga nagagikan sa Department of Agriculture pinaagi ni Regional Director Eduardo Holoyohoy.
Nasayran ning buhatan sa impormasyon gikan sa City Agriculture Office pinaagi ni Engr. Kerr Porlas, nga ang naasoyng proyekto maoy usa ka access nga dalan nga mao’y maga-abri sa agi-anan nga mas du-ol padulong sa merkado ug sa ubang kabaranggayan nga dili na maglisod ang mga mangingisda alang sa pagtumod sa ilang mga abot.
Nasayran usab nga ang nahisgutang proyekto ang ubos kini sa programa sa rehiyonal nga buhatan sa DA mahitungod sa Agro- Fishery Industry.
Matud pa ni Porlas nga duna’y mga dagkung kalambo-an ang maangkon sa maong mga barangay gumikan kay himu-on naman nga usa ka Fish Landing Site ang dapit sa Surf gumikan kay daku ang lona diin mahimo usab kining bularanan sa isda ug paglama sa ginamos.
Gikatakda nga i-down load ang nasangpit nga pondo pagkahuman sa pagpirmahanay sa Memorandum of Agreement (MOA) tali na sa City Government pinaagi ni Mayor Evelyn T. Uy ug sa rehiyonal nga buhatan sa DA pinaagi usab ni RD Holoyohoy.
Nalipay ang inahan ning dakbayan gumikan kay usa kini ka dugang na usab nga kalamboan nga ibubo sa dakbayan alang sa mga katawhang Dipolognon ug sa kinabag-ang katawhan. (Dipolog City Information Office)
20