Salay housing project natagamtaman na sa residente

MISAMIS ORIENTAL – Pormal na turnover ang 24 duplex-type housing units ngadto sa mga residente sa Purok-7 Hanil gikan sa lokal nga pangagamhanan sa Salay kaabag ang National Housing Authority (NHA).

Nagsugod na og pamalhin ang mga residente sa ilang konkreto nga puloy-anan nga aduna na’y kaugalingong comfort room, tubig ug kuryente. Ang turnover parsyal pa lang sa 100 housing units (35 duplex type, 30 single type) sa Phase 1 sa maong proyekto.

Adunay gamayng kontribusyon ang mga lomulopyo matag bulan nga P500 nga himuong trust fund alang sa dugang kalamboan sa lugar. “Hinaot nga inyong masabtan nga ang munisipyo mangolekta sa inyo kay para ra man sad na ibalik sa katawhan…ang ma-generate nga fund, gamiton i-maintain sa project, ipadayon sa land development or ipalit pa gyud og padayon nga resettlement project,” matod Engr. Fe Ancheta, District 1 manager sa NHA.

Dugang ni Ancheta nga sa tibuok lalawigan sa Misamis Oriental, pipila pa lang ka lungsod ang naka tagamtam sa ilang housing project, gani gipasalig niya nga andam sila mo-tabang sa Phase 2 kung matapos na ang Phase 1 sa di pa mahuman ang tuig. “Sa among pag-evaluate sa inyong lungsod, progressive siya so naa pa mo’y duha ka project nga pwede namo i-finance. Kining inyong Housing project karon, isa ni sa wala giapil sa Commission on Audit sa ilang audit observation tungod kay nakita nila nga gi-implement og insakto sa inyong mga opisyales.”

Gisaysay ni Ruwena Daling, pangulo sa Purok-7 Hanil United Urban Poor Association, sa iyang testimonya nga nahiabot sila sa sentro isip mga bakwit gikan sa barangay Ili-ilihon, Alipuaton, Matampa ug Guinalaban tuig 1980s, ug pinaagi sa ilang mga katigulangan, mihangyo kang kanhi mayor, Angelo Capistrano, Sr., sa pagtugot kanila nga makatarok sa ilang panimalay sa Hanil.

Gihimo ang partial turnover sa proyekto aron nga mapuy-an na kini sa mga residente ug aron makasugod na sab og tukod didto sa ilang gihawaan.

Gihangyo sila ni Mayor Angelo Capistrano Jr nga magmatinumanon sa pagbayad sa ilang kontribusyon kay ang local government unit mag plastar sa dalan sa sulod, mga suga, ug kanal. Hangyo lang niya nga atimanon sa mga residente ang proyekto ug dugang niya,“Kinsa’y namuyo dinhi, mao ra’y makapanag-iya. Ayaw na ninyo sagoli sa lain aron di ta mag problema. Gawas kung nanobra na, pwede nato ihatag sa lain.” Duna pa’y dugang 100 ka benepisyaryo ang target nga mahatagan sa proyekto.

“Mintras naa pa ko sa posisyon isip nga mayor, dalion ko gyud ni nga mahuman…Kung nasapon ko lang ni sa paglingkod nako, dali ra unta. Kay di ko gusto’g project nga abtan og pila ka tuig. Puhon, kung naa pa ko’y kahigayonan, paningkamotan nako ang phase 2 aron maapod gyud tanan. Kay once masugdan, dali ra na na siya mahuman,” sigon ni Mayor. (PIA, Mindanao Examiner)

20