CEBU CITY – Giuswag sa Government Service Insurance System (GSIS) ang pagpanawat sa 2014 Scholarship program alang sa mga dependents sa mga aktibong sakop niini.
Human sa pagtugot ni GSIS President ug General Manager Robert Vergara, giuswag ngadto na sa Hunyo 30 ang katapusang adlaw sa pagpanawat sa mga apolikasyon sa mga buot makakuha sa scholarship.
Nagtuo ang GSIS nga pinaagi sa programang scholarship, mahatagan niini og higayon ang mga anak sa mga banay nga sakop sa GSIS ug ubos lamang ang kita, sa pagtapos sa kolehiyo.
Duha ka gatus sa estudyanteng mo-entra sa kolehiyo sa tuig 2014-2015 ang mahimong kaabagan sa GSIS hangtud sa P20 mil matag semester sa matrikula ug miscellaneous fees, samtang laing P2 mil ang madawat sa scholar sa matag buwan sa pagtungha.
Matud sa GSIS, tanang sakop niini nga nakabayad sa ilang premiums sa labing duol nga 6 ka buwan ug permanenteng empleyado sa kagamhanan nga may regular nga status sa iyang pagka membro sulod sa tulo ka tuig, mahimong moduso sa aplikasyon sa ilang mga anak o dependents.
Hinuon, aron dili usab makunhuran ang tsansa sa mga bata, kadtong anak sa membro nga midawat sa sweldo sa Salary Grade 24 pa-ubos ang mga mahimong mosalmot sa scholarship.
Mahimong isulod sa scholarship kadtong mosulod sa unang ang-ang sa kolehiyo nga nadawat na sa kurso nga aprobado sa CHED alang sa upat o lima ka tuig, sa us aka tunghaan nga gitugotan sa CHED.
Kinahanglan lamang nga moduso ang kwalipikadong sakop sa GSIS sa application form, certificate of employment ug i-uban niini ang sertificate sa tunghaan nga na-enrol na ang kandidato sa scholarship.
Ang application ipasa sa GSIS Tagbilaran Branch Office, diin ang branch maoy unang mohashas sa applications.
Matud sa GSIS, kadto lamang miduso sa kompleto nga papeles ang iapil sa pagtimbang-timbang sa dili pa kini iduso nagdto sa kaulohan, alang sa pormal nga pagtumbok sa scholarships. Sa dugang pangutana, bisitahe ang local nga buhatan sa GSIS. (Rey Anthony Chiu)
20