DIPOLOG CITY (Mindanao Examiner / June 25, 2013) – Usa ka resolusyon na usab ang gipangamahanan ni kanhi konsehal ug karon Vice Mayor-Elect Horacio Velasco diin gihangyo niini si Department of Interior and Local Government Secretary Mar Roxas nga mohatag ug fire trucks, lakip na ang kompletong ekipo sa pagsumpo sa sunog aron adunay hinanaling magamit ang Bureau of Fire Protection.
Mao kini ang nasayran sa buhatan sa Impormasyon atol sa pagpahigayon sa Regular Sesyon kaniadtong semana, sulod sa SP Session Hall, ning dakbayan.
Matud pa ni Velasco nga mipasar siya ug laing resolusyon tungod kay dili sigurado nga nadawat ni kanhi DILG Secretary Jesse Robredo ang iyang nahaunang resolusyon nga nagahangyo sa naulahi ug dugang firetrucks alang dinhi sa siyudad gumikan kay dauton na ang existing firetrucks nga gigamit karon sa mga personahi sa BFP.
Dugang pa nga nakadawat usab siya ug feedback gikan sa kauluhang Manila diin matud pa adunay 30 ka mga bag-ong firetrucks ang miabot karon sa buhatan sa DILG aron iapod-apod kini sa mga nanginahanglang lokalidad.
Tungod niini, giaprobahan gilayon sa hawanan sa konseho ang maong gipadas-ug nga resolusyon aron masiguradong mahatagan usab ang dakbayan ug mga bag-ong firetrucks ug ekipo sa panahon na unya nga iapod-apod na sa maong buhatan kining maong mga ekipo.
Kahibaloan nga alayon ang pag-upgrade sa mga kahimanan sa BFP sa programa ug vision ni Mayor Evelyn Uy. (ACA)
20