ANG KONSPIRASIYA sa pagpatalsik kang Presidente Rodrigo Duterte nga gipasiugdahan sa CPP-NPA-NDF ug sa mga kleriko-politikal nga pwersang panggubot nasakpan ug ningresulta sa diha-diha nga pagkanselar sa negosasyon bahin sa kalinaw didto sa layong nasud sa Norway. Ningsangpot sab ni sa pag-anunsyo ni Duterte nga ang tanan nga umaabot nga mga peace talk pagahimoon lamang dinhi sa Pilipinas og pwede sab ning ipursige sa nasyonal o sa rehiyon.
Nagklaro na ang Presidente sa iyang mga kondisyones. Iyang gipulpog ang pantasya ni Jose Ma. Sison bahin sa usa ka gobyernong koalisyon, nagmando kang Sison nga mohunong na og pangolekta og revolutionary tax ug samtang ginapahigayon pa ang lokal nga mga inisyatiba sa kalinaw ang mga kombatante sa NPA magpabilin sa lugar nga gi-assign ngadto kanila.
Si Sison hinoon wa pa mahutdi og mga palusot. Sanga-sanga ang dila ug hasler kaayo sa double talk ang kanhi propesor ni Duterte. Ang iyang estudyante nasayud kaayo niani ug tataw kaayo nga wa na mangginano sa ideolohiya nga bitbit ni Joma. Ang katapusan ug di na mausab pa nga dalit sa Presidente sa iyang paluya na nga titser mao ni: “Tagaan ta ka og round trip tiket. Uli na ug akong igarantiya nimo ang imong kahilwasan ug seguridad, patambalan ta ka, sabotsabotan nato ang kalinaw, ug kun di ta magkasinabot, ako mismo ang mokuyog ug mohatod nimo sa airport aron ka makabalik sa Netherlands.”
Mientras tanto, ang plano sa pagpalagpot kang Duterte nadiskubrihan. Napwersa si Joma sa pag-admitir nga ang CPP-NPA-NDF (nga karon gimubo na og CNN) apil sa laraw sa pagpalagpot kang Duterte. Iya sab nga gibutyag ang gitasar nga panahon nga mao ang bulan sa Oktubre, nga human niini, matud pa niya, makignegosasyon na daw sila sa bag-o kuno nga liderato.
Sa iyang bahin, ang Presidente ning-isyu og kusgan ug gahi nga direktiba nga ningresulta sa pagkaputol sa komunikasyon tali sa Norway ug sa Malacanang. Ang nasalbar lang gikan sa Oslo talks lagmit ang pagpadayon sa papel sa Norway nga facilitator.
Si Sison nangayo og asylum sa Utrecht, Netherlands sa 1987. Ang European Union ug ang Estados Unidos ningdeklarar sa CPP-NPA nga usa ka teroristang organisasyon. Apan bisan pa niini, ang gobyerno sa Pilipinas ningpahinay sa proseso sa korte sa pagdiklarar sa CPP-NPA nga teroristang organisasyon por respeto sa nagpadayon nga peace talks sa Norway.
Ang gahi nga pagdumili ni Sison sa pakigsabotsabot lagmit nga moresulta sa lihok nga makaipit kaniya. Pwedeng ang proseso sa korte mopaspas ug ang maong signal sa pagdeklarar sa CPP-NPA nga teroristang organisasyon lagmit nga mopwersa sa Netherlands sa pagdeport kang Joma ug sa iyang mga kauban pabalik dinhi sa Pilipinas kun diin sila ikulong aron moatubang og mga kaso.
Ang lain nga aksyon mao ang pagpursige nga mas makusganon pa sa kampanya batok sa NPA gamit ang pinakusog na nga pwersa sa Armed Forces of the Philippines. Gawas pa, ubay-ubay na ang panon sa mga elemento sa NPA nga ningsurender sa gobyerno. Daghan na ang nakaamgo nga ang katikaran ug ebolusyon sa politika ug ekonomiya sa China ug Russia nagpakita sa kawalay hinungdan sa agenda ni Sison ug sa CPP.
Nasayud ang NPA nga kaya ni Duterte ang paghimo sa duha ka butang. Ang pagdaog sa giyera nga ningtagal na og upat ka dekada o ang pagpakigsabot sa kalinaw aron dawaton sila og usab sa katilingban kun diin sila manimuyo nga produktibo ug malinawon. Ang liderato sa CPP-NPA nag-usik-usik sa oportunidad sa pagsalmot sa agenda sa gobyerno sa pagreporma pinaagi sa paghatag kanila og mga posisyon sa Cabinet kun diin sila makatampo unta sa maksimum nga pamaagi.
Niining higayona modalit si Duterte og garantiya sa kalinaw ug binulto nga nagkalainlaing tabang diretso ngadto sa mga rebolusyonaryo.
Dili biyaan ang kalihokan sa pagkab-ot sa kalinaw apan sukad karon mas daghan na og himoon nga aksyon ang gobyerno, dili istorya lamang. Ang kabug-at sa maong trabaho sagubangon ni Peace Adviser ug Kalihim Jesus Dureza ug Kalihim sa Pamuo ug Chief Peace Negotiator Bebot Bello. Di na kinahanglan nga isulti pa nga kauban sa opensibang militar ang daghan kaayong oportunidad para sa mga mobalik sa balaod. Ang pagsabotsabot bahin sa kalinaw sa ang-ang sa rehiyon ang nakit-an nga mas haum ug mas motubag sa panginahanglan subay sa kasinatian sa kapaspas sa pagtubag sa mga panginahanglan sa mga bag-ong rebel returnees og yuta nga mauma, hinabang nga pinansyal ug balay nga kapuy-an.
Duha na lang ang kapilian sa CPP-NPA-NDF: pagpadayon sa armadong pakigbisog o paghunong sa armadong pakigbisog pinaagi sa pagsurender ug pagsugod og bag-ong kinabuhi. (Jun Ledesma)
20
