MAKAPAKURAT KAAYO! Ang Social Weather Station ningpagawas og 11 ka puntos nga pagkibra sa rating sa katagbawan sa administrasyon ni Pres. Rodrigo Duterte. Paglabay og duha ka adlaw, ninggawas sab ang makapugwat nga resulta sa survey sa Pulse Asia nga nagpakita nga 88% sa katawhang Pilipino uyon sa Presidente ug 87% nagasalig kaniya.
Unsa man gyud ang kalainan sa “katagbawan” ug “pag-uyon”? Kun “ningsalig” ka sa tawo, apil na niini ang pag-uyon sa iyang mga gihimo ug dili ni mokibra bisan og wa ka matagbaw sa iyang gihimo. Apan kun ang gihatag nga grado sama ka taas sa 88 sa ning-uyon og 87 ang may kompyansa, anaa kita sa kahimtang nga bisan og ang tanan nga gilauman wala matuman o walay katagbawan, ang kinabag-an sa katawhang Pilipino may kompyansa sa Presidente tungod kay iyang gideliber ang iyang mga panaad ug hingpit silang uyon sa iyang mga gipanghimo. Sukad masukad wa pa gyud ni mahitabo nga taas kaayo nga grado sulod sa tagal nga panahon.
Para sa usa ka Presidente nga hapit na mohuman sa ikaduhang tuig sa iyang administrasyon, ang gidaghanon sa ning-uyon ug nagsalig kaniya pwerte kadaghan ug wa pa gyud sukad makab-ot sa nanag-unang okupante sa Malakanyang. Dapat mopatugbaw ni og makabungog nga mensahe sa paksiyon nga nagkomplot nga palagputon si Duterte ug angay nga mobiya na lang sila sa ilang adbenturismo. Kini nga realidad mokombati sa mensahe sa CBCP nga pinaagi sa ilang mga sermon sa pulpit ma Domingo nagapadayon sa pag-ilad sa mga nanimba bahin sa ilang ginatawag og “way kasegurohan nga panahon” sa nasud. Ang ilang mga paningkamot sa pagdaot sa pangalan sa Presidente sa wala pa ang State of the Nation Address (SONA) way epekto.
Ang mga survey sa SWS ug Pulse Asia parehong gihimo sa Hunyo. Kini ang panahon kun diin ang oposisyon kontra sa Tax Reform for Acceleration and Inclusion law kusog kaayo. Ang resulta sa mga survey nagahulagway og lahi nga realidad kontra sa mga kritiko ug sa oposisyon nga ningsugod na og pasangil sa TRAIN nga mao ang sinugdanan sa pagsaka sa presyo sa mga epektos.
Dili sila makadawat sa kamatuoran nga para niadtong mga tawo nga exempted magbayad og buhis sa kita nilang 250,000.00 kada bulan, dako og kaayohan ang ihatag niining mao nga exemption. Gamit nila ang kinulokoy nga pasangil nga ningsaka ang presyo sa gasolina ug sa bugas tungod sa TRAIN law. Apan ang katawhan kahibalo sa tinuod nga hinungdan. Naigo ang tanan niining krisis sa oil.
Ang Iran mipakunhod sa iyang produksyon aron mobalos sa US Sanctions ug ang Venezuela halos way production tungod sa ilang internal nga politika nga gubot pa sa lukot. Ang mga Filipino nakahibalo nga bisan ang US nagahunahuna na og mga lakang nga gamiton niya ang iyang dako kaayo nga reserba sa oil aron pakalmahon ang presyo sa oil sa baligyaanan. Kini nga lakang dugang sa iyang paghangyo sa Saudi Arabia nga dugangan pa ang produksyon sa oil sa naulahi.
Di pa gyud ni bastante sa mga kritiko. Giapil na nila ang isyu sa implasyon. Apan bisitai ug obserbahi ang mga malls, mga palengke, mga tindahan sa sari-sari ug mga sidewalk. Daghan kaayong mga mamamalit. Tag-as kaayo ang pila sa mga kan-anan. Piskay kaayo ang negosyo, di sama niadto. Ang mga condo unit sa Davao halin kaayo. Ang ekonomiya sa Davao Region ningsulbong na og sobra 10% nga labaw pa sa maayong kahimtang sa nasudnong ekonomiya.
Unsang “panahon nga walay kasegurohan” ang ginaistorya sa Simbahang Katoliko ug ginapanghadlok nila sa ilang mga magtutuo? Way katagbawan ang tawo ug way kinutoban ang iyang kahakog bisan og busog na. Di paigo ni King Solomon ang usa ka asawa ug gatusan ang iyang mga kabit. Wa siyay katagbawan ug wa mouyon ang Diyos sa iyang pagka kalibutanon. Ang usa ka nasud nga nahitumpawak sa kinadaotan sa rehimeng Aquino di nimo mabasol kun ang katawhan mouyon ug mosalig sa kampanya ni Duterte kontra sa droga, sindikato sa mga criminal, terorismo ug kurapsyon.
Matud pa sa usa ka awit, “lagmit wala sa atoa ang tanan natong gusto, apan anaa sa atoa ang tanan nga motubag sa atong mga panginahanglan”. Kini ang sumada sa kalainan sa lawom nga kahulogan sa “katagbawan”, “pag-uyon” ug “pagsalig”. (Jun Ledesma)
20
