CEBU CITY – Ang garbo sa mga Sugbuanon nga mao ang Tribu Lumad Basakanon sa Barangay Basak San Nicolas ning syudad maoy nirepresentar sa Pilipinas sa bag-ohay pa lang gipahigayon nga Asia Pacific Culture Festival.
Kaduha nga mipasundayag sa Sinulog Dance Ritual ang Tribu Lumad Basakanon atol sa Gala Night ug Street Parade sa maong Festival nga gipahigayon sa Purwakarta Indonesia niadtong Agosto 27-30 ning tuiga.
Kahinumdoman nga ang mikampiyon sa Sinulog Festival 2014 sa dakbayan sa Sugbo ug Aliwan Festival 2014 didto sa dakbayan sa Manila mao ang Tribu Lumad Basakanon nga mihakot usab sa Best in Musicality, Best in Costume, ug kampiyon usab sa Street Dancing sa maong mga festivals.
Ang Asia Pacific Culture Festival subay sa pagsaulog sa “183th Anniversary of the Township of Purwakarta” ug “46th Anniversary of the Regency of Purwakarta” sa naasoy nga nasod.
Misalmot usab sa usa ka Cultural Exhibit ang Sinulog Festival sa Dakbayan sa Sugbo atol sa maong upat ka adlaw nga Asia Pacific Culture Festival. Hinoon dili usa ka kompetisyon ang exhibit ug ang festival.
Dugang pa, ang Asia Pacific Culture Festival gisalmutan usab sa mga delegasyon gikan sa nasod sa Myanmar, Thailand, Vietnam, Singapore, Malaysia, India, Korea, Japan ug China. (Greggy Jiggs P. Senados)
20