‘Unsa na man Kalihim Aguirre? Ni Jun Ledesma

FIVE DEGRESS Cesius sa Munich ug karon sa Prague tugnaw pa gihapon, apan ako pa nga gibati and kaigang nga gikan sa Department of Justice tungod sa pagdismiss sa mga prosecutor sa mga kaso kontra sa mga detenido nga mga hari-hari sa droga. Paggikan nako sa Manila, ang mga unang panid sa mga mantalaan ug mga social media ningkarga sa eskandaloso ug ipanghimaraot nga desisyon nga gihmo niadtong Disyembre apan gibutyag lang karong Marso. Dili lang katahapan ang maong desisyon kundili magsuspitsa sab ka kay mora og gibale-wala ug wa kini hatagi og igong kabug-aton ni Kalihim Vitaliano Aguirre sa DOJ ug ang iyang pagkaignorante bahin sa mga panghitabo ug mga katikaran sulod sa iyang departamento.

 
Kun si Presidente Rodrigo R. Duterte nagapangita pa og mga kaaway ug mga nagasabotahe sa giyera batok sa droga, di na siya angay moadto pa og layo. Pikal kaayo ang Presidente nga ningmando sa mora og mapasagaron nga Aguirre nga iparebyu ang mga kaso… Kundili… Si Aguirre nga ningsulay og panghunaw sa nahitabo ningsunod pinaagi sa pagmando sa National Bureau of Investigation sa paghimo og imbestigasyon. Apan sa akong tan-aw, angay kini nga tugbangan og laing imbestigasyon nga independente sa DOJ aron malikayan ang akusasyon nga gitabonan lang ang katinuoran.


Nasuko ang Presidente ug ang publiko tungod kay ang mga suspek nga detenido ninghimo na og mga pagkumpisal sa ilang mga sala ngadto sa publiko apil na niini ang ilang pagkalambigit sa mga sindikato sa droga ug sa pagpahatpahat ug pagpamaligya niini didto sa usa ka serye sa mga hearing ug imbestigasyon nga gipahigayon sa kongreso. Ang imbestigasyon nga gisabwag sa tibuok nasud pinaagi sa nagkalainlaing lutsanan sa media ningpadayag sa mangil-ad ug mangilngig nga kamatuoran nga ang numero uno nga prisohan sa Bureau of Corrections mao ang sentro sa distribusyon sa droga sa tibuok nasud. Ningbulgar sab kini sa pang-adults-only nga mga sugilanon bahin sa kakatol sa bugan ni DOJ Sec. Leila de Lima uban sa mga prominenteng priso ug sa iyang drayber.

Si Senador De Lima nga gidetenir basi sa order sa Korte nangayo og medical leave di pa lang dugay. Tungod sa pagkasipyat sa iyang manununod nga banga pa sa tadyaw sa pagpursige sa mga kaso kontra sa mga suspek sa droga, basin og di na niya kinahanglanon nga hilngon pa og doctor.


Sa akong kwarto sa usa ka hotel diri sa Munich, akong gisud-ong kun unsa ug si kinsa ang ninggula sa Facebook. Kusog kaayo ang kagahub nga angay nga palagputon ni Presidente si Aguirre. Akong nadungog gikan sa Tigpamaba sa Presidente nga si Harry Roque nga gibatibati siya og kasaba sa Presidente. Di na siya angayan nga moapil sa mga miting sa gabinete apan bahala na siya sa paghimo og desisyon bahin sa iyang kapalaran. Siya ang hari sa iyang kaugmaon ug kahibalo siya sa rota nga angayng subayon.


Di man kulang si Presidente og mga abogadong de-kampanilya ug mga hawod sa balaud ug seguradong mobandera sa iyang giyera batok sa droga ug mga drug lord ug mopukan sa maong tunglo ug sa han-ay sa mga drug lords. Pwerte kalig-on sa iyang mga kredensyal ug sa iyang agi sa pagkupot sa mga pareha nga mga kaso. Pwerteng taasa og kwalipikasyo, siya mao si Atty. Ed Batacan. Di na kinahanglan nga ako pang idetalye ang mga kredensyal tungod kay si Presidente Duterte mismo mas nakasinati kaniya. Problema lang kun dawaton ba ni Batacan ang trabaho sa gobyerno. Sa akong tan-aw, kun order gyud gikan sa Presidente, lagmit iya kining dawaton.


Unsaon na lang si Secretary Aguirre? Ang pagkaopaw dili igo nga rason sa pagluwat sa posisyon, apan karon ang hustong panahon sa pagresayn. (Jun Ledesma)

Like Us on Facebook: https://www.facebook.com/mindanaoexaminer
Follow Us on Twitter: https://twitter.com/MindanaoExamine
Read Our News on: https://www.mindanaoexaminer.com and  https://mindanaoexaminernewspaper.blogspot.com/
Share Our News
Digital Archives: issuu.com/mindanaoexaminernewspaper