PAGADIAN CITY (Mindanao Examiner / June 25, 2014) – Tukoron ang mga fire sub-station sa barangay Danlugan, Santiago ug Tiguma sa Pagadian City. Matod ni City Fire Marshall Reggy Olmedo, apil sa Bureau of Fire Protection (BFP) expansion program ang katukoran sa fire substations.
Mipasabot si Olmedo, nahimutang ang barangay Danlugan, siyete kilometros gikan sa city proper busa, kinahanglan ang sub-station.
Serbisyohan sa Danlugan substation ang kinse ka barangay, samtang serbisyohan sa Santiago sub-station ang walo ka coastal barangay.
Ubos sab sa Tiguma sub-station ang walo ka barangay sa Pagadian City, ug ang Labangan, Zamboanga del Sur.
Sa pagkakaron giabaga sa Pagadian City Fire Station ang lima ka lungsod sa Zamboanga del Sur nga walay fire truck hangtod karon.
Kini mao ang 2 ka mga lungsod sa Labangan ug Tukuran sa unang congressional district ug 3 ka mga lungsod sa Dumalinao, Tigbao and Lakewood sa ika duhang congressional district.
Matod ni Olmedo, kulang pa gani og lima ka fire truck ang Pagadian City kung ibase sa ratio nga usa ka fire truck matag 20 mil ka molupyo nga ang siyudad adunay hapit 200 mil ang papulasyon.
Sa maong expansion program ang Barangay maoy mo donate og luna alang sa pagatukoron nga fire sub-station nga gastuwan sa BFP, dugang pa si Olmedo.
Sa pagkakaron gastuhan una sa Barangay ang pagtukod sa temporaryong sub-station samtang wala pay luna nga permaninteng matukoran.
Mapasalamaton ang mga barangay officials sa pagkatukod sa fire substations sa ilang mga dapit.
Matud pa ni Barangay Santiago Capitan ug Liga ng mga Barangay President Jurefer Pulmones nga suportado nila ang maong expansion program sa BFP. (Jong Cadion, Ely Dumaboc)
20