LEYTE – Si Presidential Adviser on Environmental Protection Secretary Neric Acosta mitumbok sa panginahanglan makabaton og igong kagahum ang mga katawhan ug ang katilingban nga ilang gipuy-an aron sila makabangon pagdali human dayon sa mga natural nga katalagman.
Sa symposium sa Post-Yolanda Eastern Visayas nga ginganlan “Tindog Visayas: Tanum Para sa Paglaum”, si Acosta miingon nga ang kinaiya sa pagkalubay-lubay naa na daan sa tawo, ug sa palibut nga lugar diin siya nagpuyo, busa sa labing sayo nga makabarug sila gikan sa trahedya mas labing maayo.
Si Acosta, kinsa mao usab ang General Manager sa Laguna Lake Development Authority, nibuyag sa pipila ka sector kinsa buot na lang magsalig sa tabang gikan sa gobyerno kanunay, bisan pa sa samang higayon gisaway sab nila ang gobyerno kay matud pa wala maminaw sa ilang mga “emergency” nga mga gipangayo.
Ang tumong mao gyod ang pagtabang sa mga komunidad aron kini sila makatabang sa ilang kaugalingon sa mas taas pa nga mga katakus, magamit nga kaalam, ug kon mahimo hasta na mga teknolohiya ug mga kahimanan pagpalambo sa pagpangandam ug sa dali nga pagbangon, ingon ni Acosta.
Gihimo niyang pananglitan ang pagsagop sa mga transitional shelters sa upat ka lungsod sa Leyte nga naglakip sa Tabon-tabon, Julieta, Lapaz, ug Dulag, diin matag cluster sa kada lungsod dunay tag napulo ka mga kabalayan gama sa coco lumber ug kawayan, ug ang mga tawong nanimuyo ning maong mga clusters motindog na di madugay sa ilang kaugalingong mga tiil sanglit kining maong kalaki mo-aginod na man sab ngadto sa laing mga dapit.
Ang Tindog Visayas nga gipasiugdahan sa iyang buhatan naglantaw lapas pa sa mga temporary, ang gitawag nga mga band-aid solutions.
Giklaro ni Acosta nga ang Kabisay-an nagkinahanglan og resiliency management ug kini dili lang kay nag-limit sa pagpabarug sa mga komunidad, kondi naghatag sab og kasangkapan aron ang mga tawo makapangandam nang daan sa grabeng epekto sa climate change kon grabeng pag-usab-usab sa panahon
Diha sa symposium, si Sogod Mayor Imelda Tan, asawa ni Bise-Gobernador Sheffered Tan, namahayag nga ang katuyoan sa panagtigom mao ang paghatag og agianan nga kahisgut-hisgutan ang sitwasyon, unsa nay nahimo, ug kutihoon ang mga hagit sa unahan, ingon man pagkaplag og mga pamaagi pagtubag sa maong mga hagit.
Si Dr. Eva Abad, ang Provincial Environment Natural Resources Management Officer, maoy mi-welcome sa mga nangapil sa symposium, kadaghanan mga college ug high school students, ug mga barangay officials, sa ngalan ni Gov. Roger Mercado.
Gisugilon ni Abad nga si Gov. Mercado nagpagawas og kamandoan aron ma-sige-sige na ang pagpananom og kahoy matag petsa 8 sa kada bulan, kini agig paghatag pasidungog sa mga kinabuhing nakalas sa Yolanda. (Marcelo Pedalino)
20