DAVAO ORIENTAL (Mindanao Examiner / June 21, 2014) – Samaran sa ulo ug abaga ang usa ka amahan sa dihang nahagsa ug naguba ang iyang balay nga nahimutang atbang sa Elementary School sa Barangay Pintatagan, dinhi nga lungsod sa Banaybanay human natumbahan sa dakung punoan sa lubi.
Matud pa sa biktima nga si Primitivo Puersas, 47, nga nangatulog na sila kauban sa iyang upat ka gagmay nga mga anak ug nakurat sila kay nahagsa naman ang atop sa ilang balay kay natumbahan sa lubi.
“Maayo na lang kay wala kami masentro pagka-igo sa dakung lawas sa lubi ug sa dihang naka-singgit pa ako katulo aron mangayo ug panabang, miduol kanamo ang mga Guardiya sa eskwelahan ug gi-alsa ang naka-ipit kanako nga parte sa balay. Ang mga guwardiya nagtawag sa taga barangay hall ug gidala ako sa Hospital sa Pantukan,” matud pa ni Puersas.
Samtang gidala ang biktima sa tambalanan, ang upat ka mga bata gibilin sa payag sa guwardiya sa eskwelahan gumikan kay guba na ug basa na ang ilang panimalay kay nag-ulan usab ug naghangin ug kusog atol sa mao nga hitabo.
Atol sa mao nga hitabo, wala dinha ang inahan sa mga bata gumikan kay nanarbaho sa isa ka panimalay didto sa Pantukan.
Nagtulo ang luha ug putol-putol ang tingog ni Puersas samtang nagsugilon sa hitabo uban sa dakung kaguol nga wala na siyay panimalay ug dili pa dayon siya makalihok gumikan sa samad sa iyang bokton ug ulo.
Nanghinaut ang biktima nga unta matabangan siya aron makapabarog dayon og bisan gamay lang nga balay nga kapuy-an sa iyang pamilya ilabina nga way klaro ang iyang kinitaan. (Sarx Lanos)
20